«Բանականությունը պարտվեց ռազմահայրենասիրական շիզոֆրենիային». Կարպիս Փաշոյանը հրաժարական կտա
ՀՀ առաջին փոխվարչապետի մամուլի խոսնակ Կարպիս Փաշոյանը ֆեյսբուքյան իր էջում հայտնել է հրաժարական տալու որոշման մասին:
«Ընկերներ, լավ լուր ունեմ:
Որոշեցի հրաժարական տալ և վաղը առավոտյան հրաժարականի դիմումը կլինի ՀՀ առաջին փոխվարչապետ Արարատ Միրզոյանի աշխատասեղանին: Շարունակելու եմ անվերապահորեն աջակցել Միրզոյանին և նրա թիմին:
Արտառոց ոչինչ տեղի չի ունեցել, պարզապես բանականությունը պարտվեց ռազմահայրենասիրական շիզոֆրենիային, կյանքը ցույց կտա, թե ովքեր են անարգում հերոսների հիշատակը:
Բարին ընդ ձեզ»,-գրել է նա:
Հիշեցնենք, որ Կարպիս Փաշոյանի անվան շուրջ աղմուկ էր բարձրացել ապրիլյան պատերազմի տղաների անունները շահարկելու մասին նրա հայտարարությունից հետո:
«Շատ են շահարկում տղաների անունները, թողնենք նրանց մի փոքր հանգիստ։ Ռոբերտ Աբաջյանը՝ մանկահասակ դեմքով տղան, երևի այդ պահին չի էլ հասկացել՝ ինչ է կատարվում։ Թողնենք մի փոքր հանգիստ։ Ընդամենը 18 տարեկան տղա ...։ Ինձ թվում է չարժե շահարկել այդքան նրանց անունները»,- ընդգծել էր նա:
Ավելի ուշ նա մեկնաբանել էր իր այս հայտարարությունը, նշելով, որ «Չեն հասկացել, թե ինչ է կատարվում» արտահայտությունը նշելիս նկատի է ունեցել այն իրողությունը, որ տղերքից շատերը չեն հասկացել, որ լայնամասշտաբ պատերազմ է սկսել, չեն հասկացել, որ իրենց միայնակ են թողել՝ առանց փամփուշտի ու վառելիքի, արդյունքում՝ մեր զինվորները դատապարտվել են եղերական մահվան և սա բոլորիս խարանն է: