Ներման 115 խնդրագիր ուղարկվել է վարչապետի աշխատակազմ. Արտակ Զեյնալյան
ՀՀ Քրեակատարողական հիմնարկներում կասեցված է մոլեխաղեր խաղալու ավանդույթը, այսօր լրագրողների հետ հանդիպմանը, ամփոփելով իր պաշտոնավարման 100 օրը, ասաց ՀՀ արդարադատության նախարար Արտակ Զեյնալյանը՝ամփոփելով 100 օրվա աշխատանքները:
«Բռնի կերպով, հարկադրաբար մոլեխաղեր խաղալու ավանդույթը ՔԿՀ-ներում կասեցված է, մենք չենք կարող դրանք ամբողջությամբ բացառել, քանի որ մարդիկ կարող են ցանկացած բանի վրա խաղալ, այդ թվում՝ նաև թիկունքի հետևում քար պահելու վրա: Բայց զառեր, խաղաթղթեր, նման առարկաները պարտադիր վերցվում են: Մենք մշակում ենք միջոցառումների պլան, որ դատապարտյալներն ունենան զբաղմունք ու ստիպված չլինեն զբաղվել մոլեխաղերով»,- ասաց Արտակ Զեյնալյանը:
Անդրադառնալով պայմանական վաղաժամկետ ազատման համակարգի կիրառմանը՝ Արտակ Զեյնալյանն ընդգծեց, որ ՀՀ-ում պայմանական վաղաժամկետ ազատման աննախադեպ ցուցանիշ է գրանցվել: Նա մանրամասնեց, որ պայմանական վաղաժամկետ ազատման մասին 387 զեկույց է տրվել, նրանցից 192-ը հրաժարվել են, որ իրենց գործը ներկայացվի դատարան, գործերից 228-ը քննվել են դատարաններում և 84-ը բավարարվել են, մերժվել է 144-ը:
Արտակ Զեյնալյանը նաև նշեց, որ արդարադատության նախարարությունը դատապարտյալների կողմից ստացել է 160 ներման խնդրագիր:
«Ստացել ենք ներման 160 խնդրագիր, դրանցից 115-ն ուղարկվել են վարչապետի աշխատակազմ», - ասաց նախարարը՝ հավելով, որ առաջիկայում կձևավորվի նաև դիմումները քննող հանձնաժողով, որը կգլխավորի արդարադատության նախարարը: