Լուկաշենկոն «գաղտնի խորհրդակցություն» է անցկացրել Բելառուսի ինքնիշխանության պահպանման հարցով
Բելառուսի նախագահ Ալեքսանդր Լուկաշենկոն փակ խորհրդակցություն է անցկացրել՝ բարձրաստիճան պաշտոնյաների մասնակցությամբ, որի ժամանակ քննարկվել է պետական ինքնիշխանության պաշտպանության հարցը: Այս մասին հաղորդում է Gazeta.ru-ն՝ հղում անելով Наша Нива բելառուսական պարբերականին:
Ինչպես հաղորդվում է, խորհրդակցությունը տեղի է ունեցել օրեր առաջ: Պարբերականի երկու տարբեր աղբյուր հայտնել է, որ խորհրդակցության թեման Ռուսաստանի կողմից ճնշումների պարագայում հետագա գործողությունների հարցն է եղել:
«Նախագահի մոտ մեծ խորհրդակցություն է եղել: Որոշվել է մինչև վերջ պայքարել անկախության համար: Բոլորը կողմ են այդ մտքին»,- ասել է աղբյուրներից մեկը: Միևնույն ժամանակ մի շարք բելառուս նախարարներ հայտարարել են, որ ՌԴ նավթային շուկայի հարկային մանևրներին պետք է պատասխանել բարեփոխումների միջոցով, ոչ թե խորհրդակցությունների:
Միևնույն ժամանակ Լուկաշենկոյի մամուլի քարտուղար Նատալյա Էյսմոնտը հայտնել է, որ նախագահը որևէ խորհրդակցություն չի անցկացրել ՌԴ ճնշումների պարագայում երկրի անկախության հարցով:
Հիշեցնենք, որ դեկտեմբերի 14-ին Ալեքսանդր Լուկաշենկոն հայտարարել էր, որ երբեք թույլ չի տա Բելառուսի ընդգրկումը Ռուսաստանի կազմում: Երկրի «անկախության համար նա վտանգ» էր տեսել Ռուսաստանի նավթային շուկայում իրականացվող հարկային մանևրներում:
Ռուսաստանում 2019-2024 թվականներին նախատեսվում է իրականացնել «հարկային մանևրը», որն իրենից ներկայացնում է նավթի արտահանման մաքսատուրքերի աստիճանական զրոյականացում և օգտակար հանածոների արդյունահանման հարկերի բարձրացում: Բելառուսի համար ավելորդ ծախսեր են ի հայտ գալիս ռուսական նավթի ակնկալվող գնաճի և արտահանման մաքսատուրքերի նվազման պատճառով: