Գերմանուհին eBay-ում վաճառքի է հանել իր 7 տարվա ամուսնուն
Համբուրգի բնակչուհին, որը ներկայանում է Dorte L կեղծանվամբ, eBay-ում վաճառքի է հանել իր ամուսնուն: Ինչպես հաղորդում է The Times-ը, «օգտագործված ամուսինը» վաճառքի է հանվել 18 եվրոյով:
40-ամյա կինը նշել է, որ նրա հետ ամուսնացած է 7 տարի: Նրա խոսքով՝ իրենց հարաբերությունները սպառել են իրենց, և իրենք «այլևս միմյանց չեն պատկանում»: Dorte L-ն բոլոր հետաքրքրվողներին խնդրել է իր հետ կապ հաստատել էլեկտրոնային փոստի միջոցով:
Նա նաև շեշտել է, որ ցանկացողները կարող են փորձել ամուսնուն համատեղելիության համար՝ նրան վարձելով սուրբծննդյան տոների ընթացքում:
Ինչպես ավելի ուշ տեղեկացրել է հայտարարության հեղինակը, ինքը բազմաթիվ հուզառատ արձագանքներ է ստացել, սակայն ոչ մի հստակ առաջարկ:
Գերմանուհին խոստովանել է, որ իրականում մտադիր չէր վաճառել ամուսնուն, իսկ հայտարարությունը տեղադրել է զվարճանալու համար: Նա հավելել է, որ ամուսինն այդ մասին չէր իմացել, քանի դեռ լուրը չէր կարդացել տեղի թերթում: