Қиймати 5 минг доллардан ортиқ бўлган заргарлик буюмларини олиб чиқиб кетишга рухсат берилди
Мазкур тартиб президент Мирзиёев 20 май куни имзолаган “Ўзбекистон Республикасида заргарлик тармоғини жадал ривожлантириш чора-тадбирлари тўғрисида”ги фармонда белгилаб қўйилди.
Фармонга асосан тадбиркорлик субъектлари 1 июлдан бошлаб олтин изловчилик фаолияти доирасида заргарлик буюмлари ишлаб чиқарувчиларни таъминлаш учун қимматбаҳо ва ярим қимматбаҳо тошларни қазиб олиши ҳуқуқига ҳам эга бўлди.
Бундан ташқари президент 2020 йилнинг охирига қадар тадбиркорлик субъектлари иштирокида ҳар бир ҳудудда камида иккита, Тошкент шаҳрида камида ўнта тайёр заргарлик буюмларини ишлаб чиқаришдан сотишгача бўлган тўлиқ жараённи ўз ичига олувчи замонавий заргарлик савдо-ишлаб чиқариш марказларини ташкил этишга ҳам кўрсатма берди.
2019 йил 1 июлдан бошлаб олтиндан ясалган заргарлик буюмларни чакана савдода сотганлик учун 1 граммига 1 000 сўм миқдорида йиғим жорий этилади.