აფხაზეთის დე ფაქტო სამართალდამცავი უწყებები ოპოზიციას აფრთხილებენ

ოკუპირებული აფხაზეთის დე ფაქტო შინაგან საქმეთა მინისტრმა გარი არშბამ დაადასტურა, რომ ოპოზიციის მხარდამჭერებმა ცენტრალური გზები გადაკეტეს სოფელ ტამიშთან და მდინარე ბზიფის ხიდზე. არშბას განცხადებით, მსგავსი ქმედება უკანონოა და აღიკვეთება.


სააგენტო „ტასის“ ცნობით, შსს-მ გაავრცელა მიმართვა, რომლის თანახმად, საზოგადოებრივი და პოლიტიკური ხასიათის მასობრივი ღონისძიებების ორგანიზებისას კანონი მკაცრად უნდა იყოს დაცული, სამინისტრო შეურიგებელი ბრძოლის პოლიტიკას აწარმოებს კანონის უპატივცემულობის წინააღმდეგ და მზად არის მართლწესრიგის დასაცავად.


დე ფაქტო შინაგან საქმეთა სამინისტროს განცხადებითვე, საზოგადოების ზოგიერთი წარმომადგენლის ქმედებები პოლიტიკური შანტაჟის ზღვარზეა და მიზნად ისახავს მცდარი, ან არასრული ინფორმაციით მოქალაქეთა განწყობებით მანიპულირებას, რამაც შესაძლოა, გამოიწვიოს რესპუბლიკაში ნეგატიური სიტუაციის პროვოცირება.


ოპოზიციამ სამოქალაქო დაუმორჩილებლობის აქცია და გზების გადაკეტვა მას შემდეგ დაიწყო, რაც 20 მაისს აფხაზეთის დე ფაქტო პარლამენტმა უარი თქვა 21 ივლისს დანიშნული საპრეზიდენტო არჩევნების 23 ნოემბრამდე გადადებაზე.


მოთხოვნის საფუძველია ოპოზიციური ბლოკის კანდიდატის, ასლან ბჟანიას ავადმყოფობა. ის ამჟამად მოსკოვის ერთ-ერთ კლინიკაში იმყოფება. ოპოზიციის წარმომადგენელთა განცხადებით, ასლან ბჟანია მოწამლეს, რადგან არჩევნებში გამარჯვების რეალური შანსი აქვს.


ე.წ. საპრეზიდენტო არჩევნების გადატანის მოთხოვნით, მეორე დღეა სოხუმის ცენტრში, დე ფაქტო პარლამენტთან გრძელდება ოპოზიციის აქცია. მისი მონაწილეები დე ფაქტო პრეზიდენტის, რაულ ხაჯიმბას გადადგომასაც მოითხოვენ.


ოპოზიციის სამოქალაქო დაუმორჩილებლობის აქციის გამო განცხადება გაავრცელა აფხაზეთის დე ფაქტო გენერალურმა პროკურატურამაც. ის მოქალაქეებს კონსტიტუციის დაცვისკენ მოუწოდებს და აფრთხილებს, რომ აქციების უკანონოდ ჩატარება და ხელისუფლების დამხობისკენ მოწოდებები კანონით ისჯება.