ოკუპირებულ აფხაზეთში ოპოზიციის მომხრეებმა გზები გადაკეტეს
„კავკაზსკი უზელ“-ის ინფორმაციით, 21 მაისს ღამიდან გადაკეტილია ოჩამჩირის რაიონის სოფელ ტამიშთან გამავალი ავტომაგისტრალი და მდინარე ბზიფის ხიდი გაგრის რაიონში.
ოპოზიციურმა პარტიებმა სამოქალაქო დაუმორჩილებლობის აქცია 20 მაისს გამოაცხადეს, მას შემდეგ, რაც აფხაზეთის დე ფაქტო პარლამენტმა უარი თქვა 21 ივლისს დანიშნული საპრეზიდენტო არჩევნების 23 ნოემბრამდე გადადებაზე.
მოთხოვნის საფუძველია ოპოზიციური ბლოკის კანდიდატის, ასლან ბჟანიას ავადმყოფობა. ის ამჟამად მოსკოვის ერთ-ერთ კლინიკაში იმყოფება.
ოპოზიციის წარმომადგენელთა განცხადებით, ასლან ბჟანია, რომელსაც გამარჯვების რეალური შანსი აქვს, მოწამლეს და ამას ადასტურებს გერმანიაში ჩატარებული ანალიზის შედეგად სისხლში ვერცხლისწყლის და ალუმინის მომატებული რაოდენობით აღმოჩენა. ასლან ბჟანიას მხარდამჭერები დეტალურ და ობიექტურ გამოძიებას მოითხოვენ.
არჩევნების გადატანის მოთხოვნით, მეორე დღეა სოხუმის ცენტრში გრძელდება ოპოზიციის აქცია. მისი მონაწილეები დე ფაქტო პრეზიდენტის, რაულ ხაჯიმბას გადადგომასაც მოითხოვენ. 20 მაისს, აქციის მონაწილეთა შორის მრავლად იყვნენ ასლან ბჟანიას მშობლიური სოფლის, ტამიშის მცხოვრებნი.
სოხუმში, დე ფაქტო პარლამენტთან ოპოზიციის აქციის პარალელურად რაულ ხაჯიმბა და მისი მხარდამჭერები შეიკრიბნენ დე ფაქტო მთავრობის შენობაში.
„ეხო კავკაზას“ ინფორმაციით, ხაჯიმბამ განაცხადა, რომ ასლან ბჟანიას მოწამვლა პირველ ყოვლისა, ხელს არ აძლევს მოქმედ ხელისუფლებას. დე ფაქტო პრეზიდენტის მტკიცებით, ბჟანიას კანდიდატურას თავად ოპოზიციაში ეწინააღმდეგებოდნენ „დღევანდელი მორალისტები“ და ალტერნატიულ ფიგურას ეძებდნენ.
რაულ ხაჯმბას თქმით, ასლან ბჟანიას მოწამვლის ვერსიის გამო, პროკურატურა, ჯანდაცვის სამინისტრო და სხვა სტრუქტურები ინფორმაციას აგროვებენ და კონსულტაციები აქვთ რუსეთის სამართალდამცავ სტრუქტურებთანაც, ამიტომ ბრალდებები, რომ ხელისუფლება არაფერს აკეთებს, სიცრუეა. ხაჯიმბას შეფასებით, ზოგიერთებს ხელს აძლევს სიტუაციის დაძაბვა.
დე ფაქტო პრეზიდენტის განცხადებითვე, მას ყველა ნორმალური ადამიანის მსგავსად სურს, რომ ასლან ბჟანია გამოჯანმრთელდეს და მისი სახელი სპეკულაციებისთვის არ გამოიყენონ.
„ეხო კავკაზას“ ცნობითვე, ბჟანიას ჯანმრთელობის მდგომარეობის შესახებ აფხაზეთიდან გაგზავნილ მიმართვას რუსეთის ჯანდაცვის სამინისტრომ უპასუხა, რომ ინფორმაცია დიაგნოზის და მკურნალობის მეთოდების შესახებ საიდუმლოა და მისი გასაჯაროება შესაძლებელია მხოლოდ პაციენტის წერილობითი თანხმობით.