ამომრჩევლების მომხრობა შავგულიძის მხარეს იქნება იმის გარანტი, რომ ხელისუფლებამ არჩევნების გაყალბება ვეღარ შეძლოს
დარღვევები, მოსყიდვა და ზეწოლა არჩევნებზე – ოპოზიცია ითხოვს, შესაბამისმა საგამოძიებო უწყებებმა სამართლიანად გამოიძიონ არჩევნების დღეს გამოვლენილი დარღვევები და შესაბამისი რეაგირება მოახდინონ.
მათი შეფასებით, ხელისუფლებამ ყველა რესურსი გამოიყენა სასურველი შედეგის მისაღწევად. ოპოზიცია ასევე არ გამორიცხავს, რომ მსგავსი მეთოდებით ხელისუფლებამ მთაწმინდის ოლქში დანიშნული მეორე ტურის დროსაც იმოქმედოს.
„მეორე ტურში სხვა ოპოზიციურად განწყობილი ამომრჩევლების მომხრობა შალვა შავგულიძის მხარეს იქნება იმის გარანტი,რომ ყველა ის არალეგალური არგუმენტი ინსტრუმენტი,რომელსაც იყენებს ხელისუფლება იქნება არასაკმარისი,“-აცხადებს „ევროპული საქართველოს ერთ-ერთი ლიდერი სერგი კაპანაძე.
გაერთიანებული ოპოზიციის ერთ-ერთი ლიდერი ხატია დეკანოიძე ამბობს, რომ ქვეყანაში სამართლიანი არჩევნები აღარ არსებობს. მისი თქმით, იმისთვის, რომ ადამიანებს დაუბრუნდეს თავისუფალი არჩევანი უნდა შეიცვალოს ხელისუფლება და ეს მთაწმინდაზე ოპოზიციური კანდიდატის გამარჯვებით უნდა დაიწყოს.
„რაც შეეხება მთაწმინდას – იმიტომ რომ არჩევნებში, ის გზავნილი ადამიანებმა უნდა გაიგონ, რომ მნიშვნელოვანია თავისუფალი არჩევანი დაბრუნდეს ქვეყანაში, უნდა შეიცვალოს ხელისუფლება, შესაბამისად უნდა გაიმარჯვოს ოპოზიციამ,“-აცხადებს დეკანოიძე.
ოპოზიციის მწვავე კრიტიკას არ ეთანხმებიან მმართველ გუნდში. ადამიანის უფლებათა დაცვის კომიტეტის თავმჯდომარის მოადგილე, დიმიტრი ცქიტიშვილი ამბობს, რომ 19 მაისის არჩევნებმა მშვიდ და დემოკრატიულ ვითარებაში ჩაიარა.
„ადამიანებს მიეცათ საშუალება მშვიდად გამოეხატათ თავის პოლიტიკური ნება. ოპტიმისტურად ვარ განწყობილი, ვფიქრობ დიდი უპირატესობით გაიმარჯვებს ჩვენი კანდიდატი მეორე ტურში,“- ამბობს ცქიტიშვილი.