ԼՂ կոնֆլիկտի վերաբերյալ ՀՀ դիրքորոշումները հայտնի են մեր գործընկերներին, մենք դրանք միշտ առաջ ենք տանելու. ԱԳՆ խոսնակը՝ Ադրբեջան-ԵՄ համաձայնագրի մասին
Հայաստանը մշտապես հավատարիմ է իրական մարդասիրական գործողություններին, բայց դրանք չպետք է հանդուրժեն անպատժելիությունը հատկապես ծանր հանցագործությունների պարագայում: Այս մասին լրագրողների հետ զրույցում ասաց ՀՀ ԱԳՆ մամուլի խոսնակ Աննա Նաղդալյանը:
«Անչափահասի միտումնավոր սպանությունը ծանր հանցագործություն է ցանկացած հասարակությունում: «Բոլորը՝ բոլորի դիմաց» սկզբունքը չպետք է արդարացնի անպատժելիությունը, մարդասիրական իրավունքի խախտումները: Ատելության հողի վրա հանցագործությունների անպատժելիությունն արդեն իսկ հանգեցնում է նոր հանցագործությունների: Նման հանցագործությունների հերոսացումը, դրանց կատարողներին հերոսացնելը ծանր երևույթ է, և մենք ականատես ենք եղել նման դեպքի, երբ հային սպանածը հերոսացվել է»,- ասաց Աննա Նաղդալյանը:
Անդրադառնալով Ադրբեջանից հնչող հայտարարություններին, թե Ադրբեջան-Եվրամիություն փաստաթուղթը 90 տոկոսով պատրաստ է, ԱԳՆ խոսնակն ասաց, որ Հայաստանն այս գործընթացում ներգրավված չէ, որովհետև երրորդ կողմ է:
Հարցին՝ Հայաստանն ի՞նչ է անում, որ այդ համաձայնագրում Արցախի վերաբերյալ հակահայկական ձևակերպումներ տեղ չգտնեն, Աննա Նաղդալյանն ասաց, որ ՀՀ դիրքորոշումը Լեռնային Ղարաբաղի վերաբերյալ հայտնի է գործընկերներին: «Մեր և մեր միջազգային գործընկերների դիրքորոշումը ամրագրված է փաստաթղթերում: Մենք ակնկալում ենք մեր գործընկերների սկզբունքային դիրքորոշումն այս հարցում: Ղարաբաղյան հիմնախնդրի վերաբերյալ մեր դիրքորոշումները մեր գործընկերներին հայտնի են, և մենք մեր սկզբունքային դիրքորոշումները միշտ առաջ ենք տանելու»,- ասաց նա: