საქართველოს თავდაცვის მინისტრი აშშ-ში იმყოფება
საქართველოს თავდაცვის სამინისტროს ინფორმაციით, განსაკუთრებული ყურადღება გამახვილდა თავდაცვისა და უსაფრთხოების სფეროში თანამშრომლობის გაღრმავების გზებზე. ლევან იზორიას განცხადებით, საქართველოსა და აშშ-ს შორის ასეთი მჭიდრო და ინტენსიური თანამშრომლობა არასდროს ყოფილა.
შეხვედრაზე საუბარი იყო საქართველოს თავდაცვის მზადყოფნის პროგრამასა და საბრძოლო მომზადების ცენტრის განვითარების პერსპექტივებზე. მხარეებმა განიხილეს შავი ზღვის რეგიონის უსაფრთხოების განმტკიცებისთვის მრავალეროვნული სწავლებების ფორმატისა და მასშტაბის გაზრდის აუცილებლობაც.
ლევან იზორიას ინფორმაციით, შემოდგომაზე აშშ-თან გაფორმდება თავდაცვის სფეროში თანამშრომლობის სამწლიანი ჩარჩო- ხელშეკრულება, რომელშიც პრიორიტეტული მიმართულებები გამოიკვეთება და ამით კიდევ უფრო განმტკიცდება აშშ-თან თავდაცვის სფეროში თანამშრომლობა. „ეს მოგვცემს საფუძველს, რომ ქვეყანა კიდევ უფრო დაუახლოვდეს ნატოს და მიღწეული თანამშრომლობის მაღალი ხარისხით ქვეყანა მზად იქნება ნატოში გასაწევრიანებლად“ - განაცხადა საქართველოს თავდაცვის მინისტრმა.
ლევან იზორიამ და ჯონ რუდმა განიხილეს საქართველოს თავდაცვის ძალების მოდერნიზაციისთვის და ნატოს სტანდარტების შესაბამისი შეიარაღებისთვის მხარდაჭერისა და თანადგომის გაგრძელების აუცილებლობაც. ლევან იზორიას ინფორმაციით, ამ საკითხშიც საქართველოს აშშ-ის მტკიცე მხარდაჭერა აქვს.