NDI: ხელისუფლების საქმიანობისა და ლიდერების შეფასების მაჩვენებელი შემცირებულია
კვლევის თანახმად, მოსახლეობის 46 პროცენტი ამბობს, რომ ქვეყანა არასწორი მიმართულებით ვითარდება, 25 პროცენტის აზრით კი - სწორი მიმართულებით.
2018 წლის დეკემბრის შემდეგ 48 პროცენტიდან 56 პროცენტამდე გაიზარდა იმ ადამიანთა რაოდენობა, ვინც მთავრობის საქმიანობას ცუდად აფასებს. მოსახლეობის მხოლოდ 36 პროცენტი აფასებს მთავრობის საქმიანობას კარგად.
თბილისისა და დიდი ქალაქების მოსახლეობა მთავრობის საქმიანობას უფრო ნეგატიურად აფასებს: 64 და 66 პროცენტი. შესაბამისად. მოსახლეობა ფიქრობს, რომ ქვეყანას და საზოგადოებას სხვადასხვა ძალა ანაწევრებს, მათ შორის: ქვეყნის ლიდერები (68 პროცენტი), ქართული მედია (72 პროცენტი), არსებული ეკონომიკური სისტემა (73 პროცენტი), რუსეთი (73 პროცენტი) და პოლიტიკოსები (73 პროცენტი).
მოსახლეობას გამაერთიანებელ ძალებად მიაჩნია რელიგია (62 პროცენტი) და საგანმანათლებლო დაწესებულებები (53%).
გამოკითხვის თანახმად, ქვეყნის ლიდერების - პრემიერ-მინისტრის, პრეზიდენტისა და პარლამენტის თავმჯდომარის შეფასება ბოლო სამი წლის მანძილზე გაუარესდა. მათ საქმიანობას დადებითად მოსახლეობის 20 პროცენტზე ნაკლები აფასებს. თუმცა, მოწონებით სარგებლობს თბილისის მერის კახა კალაძის საქმიანობა (43 პროცენტი).
მოქალაქეები ყველაზე კარგად საქართველოს მართლმადიდებელი ეკლესიის (61 პროცენტი), იუსტიციის სახლების (59 პროცენტი) და ჯარის (55 პროცენტი) საქმიანობას, ხოლო ყველაზე ცუდად მთავარი პროკურატურის (14 პროცენტი), პარლამენტისა (12 პროცენტი) და სასამართლოების საქმიანობას აფასებენ.
46 პროცენტი ფიქრობს, რომ ეკლესიას გავლენა უნდა ჰქონდეს პოლიტიკური გადაწყვეტილებების მიღების პროცესზე, ხოლო 39 პროცენტი მიიჩნევს, რომ ეკლესიას ამ პროცესებზე საერთოდ არ უნდა ჰქონდეს გავლენა.
„სამწუხაროდ, მოსახლეობა მიიჩნევს, რომ ქვეყნის ლიდერები საზოგადოების ერთიანობის საზიანოდ მოქმედებენ“ - განაცხადა NDI-ს საქართველოს ოფისის დირექტორმა ლორა თორნტონმა. მისივე თქმით, საზოგადოების გახლეჩა და პოლარიზაცია საფრთხეს უქმნის საქართველოს მედეგობასა და განვითარებას, განსაკუთრებით იმ პირობებში, როდესაც მოქალაქეები ქვეყნის კურსთან დაკავშირებით უკმაყოფილებას გამოთქვამენ. თორნტონი ამბობს, რომ ლიდერები სამაგალითოები უნდა იყვნენ და საზოგადოების გაერთიანებისთვის მეტი ძალისხმევა უნდა გასწიონ.
კვლევის თანახმად, საზოგადოებაში პოლიტიკური პარტიების მხარდაჭერა კვლავ დაბალია. მოსახლეობის 37 პროცენტი მის შეხედულებებთან ყველაზე ახლოს მდგომ პარტიას ვერ ასახელებს.
“ქართულ ოცნებას” - 21 პროცენტი, “ერთიან ნაციონალურ მოძრაობას” - 15 პროცენტი, “ევროპულ საქართველოს” - 4 პროცენტი, “პატრიოტთა ალიანსს” კი 3 პროცენტი უჭერს მხარს.
ხვალ რომ საპარლამენტო არჩევნები ტარდებოდეს, მოსახლეობის 60 პროცენტს არ აქვს გადაწყვეტილი, თუ ვის მისცემდა ხმას.
ხვალ რომ არჩევნები ტარდებოდეს, 17 პროცენტი “ქართულ ოცნებას”, 14 პროცენტი კი “ერთიან ნაციონალურ მოძრაობას” მისცემდა ხმას. 3-3 პროცენტი “ევროპულ საქართველოსა” და “პატრიოტთა ალიანსს” დაუჭერდა მხარს.
NDI-ს კვლევისთვის გამოკითხვა 2019 წლის 28 მარტი-15 აპრილის პერიოდში ჩაატარა „კავკასიის კვლევითი რესურსების ცენტრმა.“ საქართველოს მასშტაბით 2 927 რესპონდენტი გამოიკითხა. საშუალო ცდომილების ზღვარი +/- 2,3%-ია.