სალომე ზურაბიშვილმა ვოლოდიმირ ზელენსკი საქართველოში მიიწვია
ვოლოდიმირ ზელენსკის და სალომე ზურაბიშვილის შეხვედრა 20 მაისს საღამოს, კიევში გაიმართა. მანამდე, საქართველოს პრეზიდენტი დაესწრო უკრაინის ახალი პრეზიდენტის ინაუგურაციას.
უკრაინის პრეზიდენტის ოფიციალურ ვებსაიტზე გამოქვეყნებული ინფორმაციით, სალომე ზურაბიშვილთან შეხვედრაზე ვოლოდიმირ ზელენსკიმ საკუთარ პრიორიტეტებზე საუბრისას თქვა, რომ მისი გუნდი პოლიტიკაში წავიდა რამდენიმე გამოწვევის გამო და მათგან უპირველესია ცეცხლის შეწყვეტა აღმოსავლეთ უკრაინაში, სადაც ადამიანები ყოველდღე იღუპებიან.
ზელენსკიმ აღნიშნა, რომ უკრაინა გააგრძელებს საგარეო პოლიტიკის თანმიმდევრულ კურსს, რომელიც მიმართულია სუვერენიტეტის და ტერიტორიული მთლიანიბის აღდგენისა და ევროპული და ევროატლანტიკური ინტეგრაციის განვითარებისკენ.
უკრაინის ახალმა პრეზიდენტმა გამოწვევად დაასახელა კორუფციის დამარცხება და თქვა, რომ ამ საკითხში საქართველოს გამოცდილება უკრაინისთვის მაგალითია.
თავის მხრივ, სალომე ზურაბიშვილმა აღნიშნა, რომ ელოდებათ კიდევ ერთი საერთო გამოწვევა - ევროპარლამენტის არჩევნები. საქართველოს პრეზიდენტის განცხადებითვე, უკრაინამ და საქართველომ პოზიციები უნდა გააერთიანონ ევროინტეგრაციის და ნატოში გაწევრიანების მიმართულებებით.
უკრაინის პრეზიდენტის პრესსამსახურის ცნობითვე, ვოლოდიმირ ზელენსკიმ და სალომე ზურაბიშვილმა განიხილეს ორი ქვეყნის ურთიერთობების განვითარების მიმართულებები. ზელენსკი და ზურაბიშვილი დარწმუნებულნი არიან უკრაინისა და საქართველოს სტრატეგიული პარტნიორობის შემდგომ გაღრმავებაში.