კობა გვენეტაძე: ინფლაცია საქართველოში მიზნობრივ მაჩვენებელთან ახლოსაა

საქართველოს ეროვნული ბანკის პრეზიდენტი ვალუტის გაცვლითი კურსის მოკლევადიან რყევაზე განმარტებას არ აკეთებს.


„გაცვლით კურსთან დაკავშირებით როდესაც ჩვენ ვსაუბრობთ მოკლევადიან პერიოდში არსებულ რყევებზე, როგორც საერთაშორისო სავალუტო ფონდი, ასევე ცენტრალური ბანკები არ აკეთებენ განმარტებას, რადგან ეს შეუძლებელია, რადგანაც ლარზე და გაცვლით კურსზე ზოგადად, კომპლექსურად მოქმედებს სხვადასხვა ფაქტორი” - განაცხადა კობა გვენეტაძემ.


ეროვნული ბანკის პრეზიდენტის განმარტებით, გაცილებით უფრო მნიშვნელოვანია, თუ რა ხდება ინფლაციასთან დაკავშირებით.


„ინფლაცია საქართველოში არის მიზნობრივ მაჩვენებელთან ახლოს“ - თქვა გვენეტაძემ. მისივე თქმით, სულ ახლახან, თბილისში ვიზიტისას საერთაშორისო სავალუტო ფონდის ხელმძღვანელმა კრისტინ ლაგარდმაც აღნიშნა, რომ საქართველოში ინფლაცია დაბალია.


დღეს, ეროვნული ვალუტის, ლარის კურსი ამერიკულ დოლართან მიმართებით ერთბაშად გაუფასურდა სულ მცირე სამი თეთრით და 2.77-დან 2.80-მდე მერყეობს ვალუტის გადამცვლელ პუნქტებში. კომერციულ ბანკებში ამერიკული დოლარის ფასი 2 ლარს და 80 თეთრს აჭარბებს.


საქართველოს ეროვნული ბანკის ამ დროისთვის მოქმედი კურსი 2.7470-ია. 22 მაისისთვის ოფიციალურ კურსს ეროვნული ბანკი საღამოს 5 საათისთვის დაადგენს.