Հանքերով զբաղվող շուրջ 13 ընկերությունների բաժնեմասերը տարբեր ժամանակներում ձեռք են բերվել ու վաճառվել օֆշորային կազմակերպությունների
ՀՀ տարածքում ոչ մետաղական հանքարդյունաբերությամբ զբաղվելու թույլտվություն ունեցող 2 և երկրաբանահետախուզական աշխատանքներ կատարելու թույլտվություն ունեցող շուրջ 11 ընկերությունների բաժնեմասերը տարբեր ժամանակներում ձեռք են բերվել մի քանի անձանց և կազմակերպությունների կողմից ու վաճառվել մի մասը Կայմանյան կղզիներում, մյուս մասը՝ Մարշալյան կղզիներում ու Կիպրոսում հիմնադրված կազմակերպությունների: Այս մասին Tert.am-ի հարցմանն ի պատասխան նշել են ՀՀ Քննչական կոմիտեից:
Հիշեցնենք, որ ՀՀ վարչապետ Նիկոլ Փաշինյանը կառավարության նիստերից մեկում հայտնել էր, որ Տնտեսական մրցակցության պաշտպանության պետական հանձնաժողովն իրեն ուսումնասիրություն է ուղարկել, որտեղ ասվել է, թե Հայաստանի հանքերի շատ մեծ մասի դեպքում որպես սեփականատեր գրանցված են օֆշորային ընկերություններ։ Վարչապետի հանձնարարականով այդ գրությունը հասցեագրվել է ՀՀ էներգետիկայի նախարարությանը, որտեղից Tert.am-ին հայտնեցին, որ ՀՀ քննչական կոմիտեի կողմից գործ է հարուցվել:
Ներկայացնում ենք Քննչական կոմիտեի պատասխանը ամբողջությամբ:
«Ձեր 13.05.2019թ. հարցման կապակցությամբ հայտնում եմ, որ ՀՀ տնտեսական մրցակցության պաշտպանության պետական հանձնաժողովի կողմից հանքարդյունաբերության ոլորտում տեղի ունեցած գործարքների ուսումնասիրության արդյունքում ներկայացված հաղորդման հիման վրա ՀՀ քննչական կոմիտեի հատկապես կարևոր գործերի քննության գլխավոր վարչությունում հարուցվել է քրեական գործ:
Նախաքննությամբ պարզվել է, որ ՀՀ տարածքում ոչ մետաղական հանքարդյունաբերությամբ զբաղվելու թույլտվություն ունեցող 2 և երկրաբանահետախուզական աշխատանքներ կատարելու թույլտվություն ունեցող շուրջ 11 ընկերությունների բաժնեմասերը տարբեր ժամանակներում ձեռք են բերվել մի քանի անձանց և կազմակերպությունների կողմից ու վաճառվել մի մասը Կայմանյան կղզիներում, մյուս մասը՝ Մարշալան կղզիներում ու Կիպրոսում հիմնադրված կազմակերպությունների: 2014-2015թթ. վերը նշված ընկերությունների գործունեությունը դադարեցվել է, այդ ընթացքում ընկերությունների հանքային իրավունքների ժամկետներն ավարտվել են ու դրանք երկարացնելու կամ պաշար հաստատելու գործընթաց չի իրականացվել: Նշված ընկերությունները հանքարդյունահանում չեն իրականացրել և շահույթ չեն ստացել: Ներկայումս այդ ընկերությունները ՀՀ տարածքում հանքային իրավունքներ չունեն և որևէ գործունեություն չեն իրականացնում»:
Ինչ վերաբերում է հարցերին, թե որ հանքերի մասին է խոսքը, ովքեր են ընկերությունների սեփականատերերը, ինչ փուլում է հարուցված գործը, Քննչական կոմիտեից նշել են, որ այդ հարցադրումների կապակցությամբ տեղեկատվություն չեն կարող տրամադրվել, քանի որ «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 3-րդ կետի համաձայն այն պարունակում է հրապարակման ոչ ենթակա նախնական քննության տվյալներ: