Մխիթարյանի փոխարեն պատկերացրեք Մեսսիին կամ Ռոնալդուին. CNN-ի հաղորդավարն ասել է ինչ անել, որպեսզի ՈւԵՖԱ-ն Բաքվից տեղափոխի ԵԼ եզրափակիչը
Բրիտանացի հայտնի լրագրող և հեռուստահաղորդավար Պիրս Մորգանը, որը ներկայում աշխատում է ԱՄՆ-ում և վարում է Piers Morgan Tonight հաղորդումը CNN-ի եթերով, կոչ է արել անգլիական «Չելսի» և «Արսենալ» թիմերին բոյկոտել Եվրոպայի լիգայի եզրափակչի անցկացումը Բաքվում:
««Չելսին» նույնպես բազմաթիվ հայ երկրպագուներ ունի, մի՞թե դուք պատրաստվում եք հանդուրժել Հենրիխ Մխիթարյանի շուրջ ստեղծված իրավիճակն ու ոչինչ չանել: Եթե երկու թիմն էլ հրաժարվի Բաքվում խաղալուց, ՈւԵՖԱ-ն կտեղափոխի խաղը», - թվիթերյան իր էջում գրել է հաղորդավարը:
Վերջինս հավելել է. «Մխիթարյանի փոխարեն պատկերացրեք Մեսսիին կամ Ռոնալդուին, կարծո՞ւմ եք` մենք նույնիսկ կքննարկեինք այս հարցը: ՈւԵՖԱ-ն կտեղափոխեր եզրափակիչը»:
Հիշեցնենք, որ ավելի վաղ պաշտոնապես հաստատվել էր, որ Հայաստանի ազգային հավաքականի և լոնդոնյան «Արսենալի» կիսապաշտպան Հենրիխ Մխիթարյանը չի մեկնի Բաքու՝ մասնակցելու մայիսի 29-ին կայանալիք ԵԼ եզրափակչին:
Անցյալ շաբաթ հայտնի էր դարձել նաև, որ Բաքուն հրաժարվել է մուտքի արտոնագիր տրամադրել «Արսենալի» բրիտանահայ երկրպագուներին: