Балык бистәсе муниципаль район Советы каршындагы Яшьләр Парламентының беренче оештыру утырышы булды (ФОТО)

– Бүгенге утырышка районыбызның җәмәгать, мәдәни, спорт тормышында актив катнаша торган яшьләр җыелган. Яшьләрне районның иҗтимагый тормышына тагын да ныграк тарту, аеруча булдыклы, талантлыларын ачыклап, киләчәктә муниципаль һәм дәүләт органнарына эшкә чакыру, депутатлыкка күрсәтү яшьләр парламентының максаты булып тора. Аның эшендә катнашу сезгә социаль-сәяси, икътисадый, хокукый өлкәләрдә белемнәрегезне арттырырга мөмкинлек бирер. Җәмәгать тәртибен саклауда үз өлешегезне кертерсез дип ышанам. Район халкының, яшьләрнең тормыш дәрәҗәсен яхшырту буенча тәкъдимнәрегезне район Советы каравына кертү мөмкинлеге дә туачак.

 

Соңгы елларда районда республикабыз Президенты һәм хөкүмәте ярдәме белән яңа спорт объектлары төзелде. Спорт, мәдәни чаралар еш үткәрелә, төрле юнәлештәге түгәрәкләр эшли. Болар барысы да яшьләрне тискәре күренешләрдән йолып калырга, көчләрен, сәләтләрен үз мөмкинлекләрен ачарга юнәлтүгә юл ача,–диде ул сәламләү сүзендә.

 

Татарстан Республикасы Дәүләт Советы каршындагы Җәмәгатьчелек яшьләр палатасы Советы әгъзасы Екатерина Согрина районнарда яшьләрнең социаль проблемаларын чишүдә, инициативаларын тормышка ашыруда яшьләр парламентларының өлеше зур булырга тиешлеген ассызыклап үтте. Алар шулай ук яшьләр өчен мөһим булган закон проектлары буенча фикер алышуларда да дискуссион мәйданчык ролен үтәр дип көтелә.

 

Утырышта район яшьләрен борчыган кайбер мәсьәләләр буенча фикер алышулар булды. Аерым алганда, чараларны  мәгълүмати яктырту. Бу җәһәттән, сайт яки контактта “ Балык бистәсе яшьләре” дигән бит  ачу турында тәкъдим керде. Спортка, мәгарифкә, экология проблемаларына зур игътибар бирелү белән беррәттән, районның тарихын да онытмаска кирәклегенә басым ясалды. Бу мәсьәлә буенча түгәрәк өстәл оештыру планлаштырылды.

“Форпост” үзәге директоры Евгений Ненастьев җәмәгать тәртибен саклауда яшьләр формированиеләренең эшчәнлеге турында сөйләде.

 

– Кайберәүләр халык белән хакимият арасындагы үзара элемтәне бик гади принципка кайтарып калдыралар: без проблемаларны куябыз, ә чиновниклар аларны чишү юлларын эзләсеннәр. Әмма бу безнең традицияләргә туры килми. Татарстанда гомуми файдалы эшләрне бергә тупланып башкару гадәте бар. Республика ирешкән уңышлар һәркемнең үз эшен намус белән җиренә җиткереп башкару нәтиҗәсе дә. Без гражданлык җәмгыятендә яшибез. Безнең бурыч- инициатива күрсәтү һәм аны хакимият белән берлектә тормышка ашыру. Менә бу хакимият белән иң нәтиҗәле элемтә. Бергә булсак без таулар күчерергә сәләтле. Республикабыз лидеры Рөстәм Миннеханов әйтмешли: “Без бергә көчле!”–дип мөрәҗәгать итте ул яшьләргә.

 

Утырышта катнашучылар Балык бистәсе яшьләр Парламенты рәисе итеп Илшат Кәримуллинны сайладылар. Шулай ук даими комиссияләр рәисләре, әгъзалары да сайланды. 

 

Наталья Хәмидуллина,

яшьләр сәясәте, спорт һәм туризм бүлеге начальнигы урынбасары.