Herson vilâyetiniñ memuriy sıñırında Rusiye sıñırcıları aq qorçalayıcı Abdureşit Cepparovnı tuta – advokat
Bu aqta advokat Mammet Mambetov Qırım.Aqiqat mühbirine bildirdi.
«Memuriy sıñırdan beraber keçe edik, men keçtim, Abdureşit ağanı ise başta 20 daqqa tuttılar, soñra eki adam kelip, sorğu vagonçığına alıp ketti», – dep qayd etti Mambetov.
Advokatnıñ aytqanına köre, Rusiye FSBsiniñ sıñır hızmeti hadimleri vaziyetni añlatmay.
«Bütün suallerime haberleri yoq, dep cevap bereler», – dedi Mambetov.
Herson vilâyetiniñ memuriy sıñırında Rusiye FSBsiniñ sıñırcıları tarafından Cepparovnıñ tutulması aqqında Qırımtatar Milliy Meclisiniñ reisi Refat Çubarov da Facebook saifesinde bildirdi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».