Оренбургта татар мәдәниятенә багышланган күргәзмә ачылды
(Казан, 21 сентябрь, «Татар-информ»). Оренбург сынлы сәнгать музеенда «Татарларда кунакта» дип аталган күргәзмә эшли. Анда Алабуга дәүләт музей-тыюлыгы экспонатлары тәкъдим ителгән. Бу хакта Бөтендөнья татар конгрессы матбугат хезмәте хәбәр итә.
Күргәзмәдә Алабуга дәүләт музей-тыюлыгы экспонатлары: 180 предмет һәм 112 рәсем сәнгате һәм графика әсәрләре куелган. Татар халкының көнкүрешен һәм гореф-гадәтләрен күрсәтә торган декоратив-гамәли сәнгать тәкъдим ителгән.
Күргәзмәдә хәзерге заман сәнгате әйберләре һәм XIX гасыр экспонатлары да урын алган. Бу - милли аяк киеме һәм намазлык. Күргәзмә Россия, Татарстан Республикасы һәм Оренбург өлкәсе Мәдәният министрлыклары ярдәме белән оештырылды. Оренбург сынлы сәнгать музеенда күргәзмә 18 октябрьгә кадәр эшләячәк.