Qırımda apiske alınğan cemaat jurnalisti Suleymanovnıñ keskin tonzilliti oldı – advokat
Onıñ aytqanına köre, Suleymanovnıñ sıcağı olsa da, onı eki kün devamında dava malümatınen tanış olmağa çıqarğan ediler.
«O birisi kün sıcağı olğan Ruslan Suleymanovnı çıqarğan ediler, ilâc bergenler. Tünevin kene çıqarğanlar, sıcağı ve yaramay alı şikâyetlerine qulaq asmadılar. Bugün FSB idaresinde baqıp, keskin tonzilliti olğanını aytqanlar. Soñra tahqiqatçılar qarar aldı – planlaştırılğan tahqiqat tedbirlerini toqtatıp, SİZOğa keri alıp ketmek», – dedi «Qırım birdemligine» Gemeci.
Onıñ fikirince, bu vaziyette «mabüslerniñ sağlıq qoruv aqqı bozula».
«Böylece olarğa basqı yapıla, raatlıq künleri bile dava malümatlarınen tanış olmağa zorlaylar ve raatlanmağa bermeyler, olarnıñ beden, maneviy vaziyetine körmemezlikke urıla. İmmunitet SİZOda zaten zayıflamaqta, Qırımdaki koronavirus hastalarınıñ sayısına ve epidemiologik vaziyetine baqılsa, felâket kötermek kerek», – dep qayd etti Gemeci.
Bundan evel advokatnıñ malümatına esaslanıp bildirilgenine köre, Bağçasaraydaki üçünci «Hizb ut-Tahrir davasınıñ» mabüsi Osman Seytumerov pnevmoniyanen hastalandı ve sentâbrniñ 20-nde tahqiqat izolâtorınıñ tibbiy bölügine acele alıp ketirildi.
Diger menbalar bu malümatnı şimdilik tasdıqlamay. Aqmescit SİZOsı advokatnıñ aytqanlarını izaatlamay.
Qırımlı cemaat jurnalisti, Aqmescitteki ekinci «Hizb ut-Tahrir davasınıñ» mabüsi Ruslan Suleymanovnıñ qabaatlavı aydınlatıldı. FSB onı 205.5 maddesiniñ birinci qısmından ekinci qısmına («terror teşkilâtında iştirak etüv») deñiştirdi.
Ruslan Suleymanov 2019 senesi mart ayında tutuldı, o vaqıttan berli SİZOda buluna. FSB, onı Rusiyede ve işğal altındaki Qırımda yasaqlanğan «Hizb ut-Tahrir» teşkilâtında iştirak etkeninde qabaatlay.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.