Սա Նարեկ Մալյանին ազատազրկելու, պերֆորմանսը ցույց չտալու համար էր․ պաշտպանը՝ Մալյանի ձերբակալության իրավաչափության մասին (տեսանյութ)
Նարեկ Մալյանին ձերբակալելու իրավաչափության վերաբերյալ որոշումը կհրապարակվի 15:00-ին։
Այս մասին այսօր Tert.am-ի հետ զրույցում ասաց ՎԵՏՕ շարժման ղեկավար Նարեկ Մալյանի պաշտպան Տիգրան Աթանեսյանը։
«Օրենք, օրինականություն, իրավունք այս իշխանությունների օրոք հավասարվել է զրոյի․ միշտ մտածում էի, որ ապօրինի կալանքի ենթարկված մարդը, երբ գլխավորի պետությունը, ամեն ինչ կանի, որ դա էլ ոչ ոքի հետ չկրկնվի։ Ցավոք, եղավ հակառակը, նա շատ ավելի ապօրինի ձևով է մարդկանց հետապնդում, քան երբևէ հետապնդվել է ինքը կամ իր ընկերները։ Դաժան օրինաչափություն է, և իրենք ավելի ստոր են լինում իրենց հետապնդումների մեջ։Պայքարելու ենք մինչև վերջ, հասնելու ենք արդարությանը մեր երկրում»,-ասաց նա՝ անդրադառնալով Մալյանի ձերբակալությանը։
Խոսելով այն մասին, թե որքանով է իրավաչափ եղել Նարեկ Մալյանին բերման ենթարկելը՝ Աթանեսյանը նշեց, որ Մալյանը ստացել էր ներկայանալու ծանուցագիր, չէինր մերժել, թեև իրավունք ուներ, ինքը զանգել ու տեղյակ է պահել, որ երկուշաբթի ավելի հարմար է։
«Դրանից հետո այս հարձակումը տեղի ունեցավ, սա Նարեկին ազատազրկելու, պերֆորմանսը ցույց չտալու համար էր։ Իշխանության համար այդ պերֆորմանսի վատն այն էրր, որ Նիկոլայ և Ելենա Չաուշեսկու կա, երևի մեր «Ելենան» հուզվել էր դրանից՝ իմանալով, ինչ ապագա կարող են ունենալ իրենց դավաճանության համար։ Ցավոք ապրում ենք զավեշտում, ապրում ենք սարսափում»,-ասաց նա։
Տիգրան Աթանեսյանը նշեց, որ այս գործով Նարեկ Մալյանը կալանավորվել չի կարող, քանի որ ՔՕ այդ հոդվածով անձը առհասարակ չի կարող կալանավորվել, վատագույնը 72 ժամ մնալն է։
Հիշեցնենք, որ երեկ Ազատության հրապարակում նախատեսված էր Մալյանի բեմադրած «Չաուշեսկուի գնդակահարությունը կամ մահ դավաճաններին» պերֆորմանսի ցուցադրությունը, սակայն մինչ այդ նա ձերբակալվել էր։