Украина президенти Кремлга алоқадор сиёсатчи ва тадбиркорларга қарши санкция жорий қилди

20 февраль куни Украина президенти Володимир Зеленский сиёсатчи ва тадбиркор Виктор Медведчук ҳамда Россия президенти Владимир Путин билан яқиндан алоқа ўрнатган бошқа украиналик сиёсатчиларга қарши санкция жорий қилиш тўғрисидаги фармонни имзолади.


Бир кун олдин Украина Миллий хавфсизлик кенгаши Медведчук, унинг рафиқаси Оксана Марченко ва яна олтита шахсга, шунингдек, тадбиркорга алоқадор 19 та ширкатга қарши санкция эълон қилган эди. Санкцияга йўлиққан шахсларнинг айримлари Россия фуқароларидир.


Санкцияларга биноан, Медведчук ва унинг рафиқаси активлари уч йилга музлатиб қўйилади ва жуфтликка Украинада бизнес юритиш тақиқланади.


Украина расмийлари, шунингдек, Медведчук назорати остида бўлган ва Украина орқали Россия газини Европага элтиб берадиган нефть ширкати ҳукуматга ўтказилишини маълум қилдилар.


АҚШнинг Киевдаги элчихона Украинанинг ўз «суверенитетини ва ҳудудий яхлитлигини санкциялар ёрдамида ҳимоя қилиш ҳаракатларини» қўллаб-қувватлашини изҳор қилди.


Медведчук унга қарши жорий қилинган санкцияларни «ноқонуний» деб атади.