د امریکا بهرنیو چارو وزیر: افغانستان کې عادلانه او تلپاتې سیاسي روغه جوړه غواړو
د دې اړیکو په دوام تېر ماښام د امریکا د بهرنیو چارو وزیر انتوني بلېنکن د افغانستان د ملي مصالحې عالي شورا له رئیس عبدالله عبدالله سره غږېدلی.
له دې خبرو وروسته، ښاغلي بلېنکن په خپله ټویټرپاڼه ولېکل، له ښاغلي عبدالله سرهیې د افغانستان د سولې پر موضوع ښې خبرې کړي.
هغه زیاته کړې، "متحده ايالات په افغانستان کې د عادلانه او تلپاتې سیاسي روغې جوړې او هر اړخیز اوربند په برخه کې له هر ډول پرمختګ ملاتړ کوي".
ښاغلي بلېنکن له عبدالله عبدالله سره خبرو کې د اوربند په برخه کې له هر ډول پرمختګ د امریکا د ملاتړ خبره هم کړې.
په ورته وخت کې د ملي مصالحې عالي شورا وايي چې د امریکا د بهرنیو چارو وزیر په افغانستان کې په روان تاوتریخوالي اندېښنه ښودلې.
دا شورا وايي، انتوني بلېنکن له عبدالله عبدالله سره په خبرو کې ویلي، په داسې حال کې چې حکومتیې د افغانستان د وضعیت په ارزونه بوخت دی، امریکا د سولې بهیر د چټکوالي او د تلپاتې سولې لپاره د یوې هوکړې غوښتونکې ده.
د دې شورا ویاند فریدون خوځون وايي: "په دې ټیلیفوني خبرو کې انتوني بلېنکن په افغانستان کې روان تاوتریخوالی د نهزغم وړ وباله او ټینګار یې وکړ چې تاوتریخوالی باید پای ته ورسېږي او سیاسي توافق ته لاره هواره شي."
د ښاغلي خوځون په خبره، د امریکا د بهرنیو چارو وزیر سره خبرو کې عبدالله عبدالله تلپاتې سولې ته د رسېدو په موخه د سولې په مذاکراتو کې د چټکتیا راتلو لپاره د نړیوالې ټولنې د همکارۍ غوښتنه وکړه.
دا په داسې حال ده کې چې په قطر کې بیا د افغانستان د سولې روان مذاکرات له نامعلوم برخلیک سره مخ دي.
که څه هم د دوهم پړاو مذاکراتو له پیل ۴۶ ورځې تېرېږي، خو د افغانستان اسلامي جمهوري دولت او طالبانو پلاوي، د اجنډا په ګډون هېڅ ډول یوې هوکړې ته نهدي رسېدلي.
دوهم پړاو خبرې د جنورۍ په شپږمه په دوحه کې پیل شوې.
بلخوا د افغانستان د سولې په چارو کې د دولت وزارت وايي، د افغانستان د دولت مذاکره کوونکی پلاوی لا هم په قطر کې دی او پر خپلو داخلي غونډو، ځینو مېکانیزمونو جوړولو بوخت دی او دغهشان د ملاتړو هېوادونو له استازو سره یوځای کار کوي.
د دې وزارت ویاندې ناجیه انوري ازادي راډیو ته وویل، مقابل لوری یې لا هم د وسلې خبرو ته نهدی حاضر شوی.
اغلې انوري زیاتوي: "د افغانستان د حکومت مذاکراتي پلاوی به تر هغه وخته هلته وي، تر هغې چې د افغانستان خلک، د ملي مصالحې عالي شورا او د افغانستان حکومتیې د بېرته ورتګ غوښتنه ونهکړي، همدلته به پاتې وي."
له دې وړاندې افغان دولت ویلي و، طالبان نهغواړي د سولې معنی لرونکې خبرې وکړي.
هڅه مو وکړه په دې اړه د طالبانو نظر له ځان سره ولرو، خو د هغوی ویاندویان خبرو ته حاضر نهشول، مګر له دې وړاندې یې ویلي و، دوی په خپلمنځي خبرو بوخت دي.
دا په داسې حال ده چې امریکا هم له طالبانو غوښتي دي چې د سولې رغوونکو خبرو ته حاضر شي او تاوتریخوالی پای ته ورسوي.
امریکا همدا ډول له طالبانو سره د سولې شوی تړون چې د فبرورۍ په ۲۹مه لاسلیک شو، له سره ارزوي.