Սեուլը Մոսկվայից աջակցություն է խնդրել Կորեական թերակղզու ապամիջուկայնացման հարցում
Կորեայի Հանրապետության պաշտպանության նախարարի առաջին տեղակալ Պակ Չժե Մինը Ռուսաստանի Դաշնության պաշտպանության նախարարի տեղակալ, գեներալ-գնդապետ Ալեքսանդր Ֆոմինի հետ հանդիպմանը խնդրել է Մոսկվային աջակցել թերակղզու միջուկազերծմանը` ԿԺԴՀ-ի կողմից հրթիռների արձակման ֆոնին: Այս մասին տեղեկացնում է «ՌԻԱ Նովոստի» գործակալությունը` հղում տալով Հարավային Կորեայի պաշտպանության նախարարությանը:
«Կորեայի Հանրապետության պաշտպանության նախարարի առաջին տեղակալ Պակ Չժե Մինը խորը մտահոգություն է հայտնել, որ վերջերս, չնայած Կորեական թերակղզում խաղաղություն հաստատելու Հարավային Կորեայի կառավարության ջանքերին, ԿԺԴՀ-ն գործարկել է կարճ հեռահարության բալիստիկ հրթիռներ: Նա խնդրել է Ռուսաստանի ակտիվ աջակցությունը Կորեական թերակղզում կայուն խաղաղության հաստատման և թերակղզու ապամիջուկայնացման գործում»,-տեղեկացրել է Կորեայի Հանրապետության պաշտպանության նախարարությունը:
Ավելի վաղ հաղորդվել էր, որ, ըստ Հարավային Կորեայի և Ճապոնիայի, ԿԺԴՀ-ն վերջերս հրթիռների 2 փորձարկում է իրականացրել. մարտի 21-ին 2 թևավոր հրթիռ է արձակվել դեպի դեղին ծով` փոքր բարձրությամբ և կարճ հեռավորության վրա, իսկ մարտի 25-ին՝ 2 բալիստիկ հրթիռ է արձակվել դեպի Ճապոնական ծով: