طالبان: نږدې ټولو دولتي کارکوونکو ته د درېیو میاشتو معاشونه ورکړل شول
له دې مخکې یو شمېر دولتي مأمورینو شکایت کاوه چې د طالبانو له واکمنېدو وروستهیې معاشونه نهدي اخیستي، خو د مالیې وزارت ویاند احمد ولي حقمل نن ازادي راډیو ته وویل د زمري میاشتې ټول او د وږې او تلې د میاشتو ډېره برخه معاشونه اجرا شوي دي.
ښاغلي حقمل زیاته کړه چې پاتې کارکوونکو ته به هم ډېر ژر معاشونه ورکړل شي.
دی زیاتوي: "که یو دوه ادارې پاتې وي، د هغو کار به هم نن د ورځې تر پایه خلاص شي، نورو ادارو ته مو معاشونه ورکړي دي. په ولایتونو کې د معاشونو کار پرون بشپړ شو. اعظمي کوشش کوو چې د پاتې ادارو چې استحقاقونهیې رالېږدلي، معاشونه هم اجرا کړو."
د دولتي ادارو مأمورینو پاتې میاشتو معاشونه داسې مهال ورکول کېږي چې د طالبانو له واکمنېدو وروسته په هېواد کې اقتصادي فعالیتونه په ټپه درېدلي او د دولتي مأمورینو په ګډون د خلکو د بېوزلۍ کچه په لوړېدو ده.