Qırımdaki Rusiye mahkemesi Nariman Celâl ve ağa-qardaş Ahtemovlarnıñ apiste qaluv müddetini uzattı – advokat
«Bugünki diñlevler vaqtında imaye tarafı ilk diñlevlerde berilgen bir sıra muracaat berdi, meselâ, delillerni çıqaruv, davanı prokurorğa qaytaruv ve dava toqtatıluvı aqqında. İç birisi qanaatlendirilmedi. Bundan ğayrı, mahkeme üç mabüsniñ apiste tutuv müddetini 2022 senesi iyülniñ 26-na qadar uzattı. Bu qarar üç kün içinde imaye tarafından şikâyet etilmeli», – dep yazdı Polozov Facebook saifesinde.
Advokatnıñ bildirgenine köre, nevbetteki mahkeme oturışuvı martnıñ 3-ne, saba saat 10:00-ğa planlaştırıldı.
Fevralniñ 18-nde Rusiye kontrolindeki Qırım Yuqarı mahkemesi Anğaradaki «gaz borusında diversiya» davasınıñ ilk diñlevlerini başlattı.
2021 senesi dekabrniñ 15-nde advokat Nikolay Polozovnıñ bildirgenine köre, Rusiye quvetçileri Anğara köyündeki «gaz borusında diversiya» davası boyunca ilk tahqiqatnı yekünledi, Nariman Celâlğa daa bir qabaatlav berildi.
Qırımtatar siyasetçisi ve faali Nariman Celâl işğal altındaki Qırımda tahqiqat ve adliyeni «yalancı» ve «sımarlanğan» dep adlandırdı.
Yanvarniñ 25-nde Rusiye kontrolindeki Qırım Yuqarı mahkemesi Nariman Celâl, Asan ve Aziz Ahtemovlarnıñ apiske alınmasına qarşı imayeniñ istinaf şikâyetini red etti. Olar eñ az fevralniñ 23-ne qadar SİZOda qalacaq.
Advokat Nikolay Polozov Nariman Celâl «tış dünyadan ciddiy bir izolâtsiyada» tutula, dep qayd etken edi.