Kryetitujt e luftës së Ukrainës
Në vijim është një përmbledhje e kryetitujve dhe deklaratave më të rëndësishme në ditën e tretë të luftimeve të Ukrainës me trupat Ruse që nisën të enjten një operacion pushtimi. E shtuna u përcjell me luftime të ashpra derisa shtete të ndryshme evropiane kanë nisur të rrisin donacionet e armatimit për Ukrainën.
* Volodymyr Zelensky tha se Kievi mbeti nën kontrollin ukrainas të shtunën ndërsa forcat ruse rifilluan sulmin e tyre, duke goditur kryeqytetin dhe qytetet e tjera me artileri dhe raketa të ndryshme.
* Mijëra flamuj dhe pankarta blu dhe verdhë, u ngritën nga protestuesit në mbarë botën në shenjë mbështetjeje për popullin e Ukrainës duke u bërë thirrje qeverive të bëjnë më shumë për të ndihmuar Kievin, për të ndëshkuar Rusinë dhe për të shmangur një konflikt më të gjerë.
* Gjermania ndryshoi qëndrimin e saj në lidhje me vendosjen e kufizimeve në qasjen e Rusisë në sistemin global të pagesave ndërbankare të njohur si SWIFT, duke iu bashkuar fuqive të tjera perëndimore në mbështetje të sanksioneve më të ashpra që synojnë ndalimin e pushtimit rus të Ukrainës.
* BE është në bisedime për një paketë të tretë sanksionesh ndaj Rusisë, tha një diplomat i BE-së për Reuters.
* Ukraina mohoi sugjerimet se po refuzonte të negocionte një armëpushim me Rusinë, por tha se gjithashtu nuk ishte gati të pranonte ultimatume ose kushte të papranueshme.
* Turqia nuk ka marrë një vendim për të mbyllur ngushticat e Dardaneleve dhe Bosforit për anijet ruse, tha një zyrtar turk për Reuters.
* Udhëheqësi çeçen rus Ramzan Kadyrov, një aleat i presidentit Vladimir Putin, tha se luftëtarët çeçenë ishin vendosur në Ukrainë.
* Kryetari i bashkisë së Kievit zgjati një shtetrrethim në kryeqytetin ukrainas të shtunën.
* Ministria e Mbrojtjes e Britanisë tha se përparimi rus në Ukrainë ishte ngadalësuar përkohësisht, ndoshta për shkak të problemeve logjistike dhe rezistencës së fortë.
* Trupat ruse pushtuan qytetin juglindor të Ukrainës, Melitopol, tha ministria ruse e mbrojtjes. Por ministri i forcave të armatosura britanike, James Heappey, tha se Britania nuk besonte se forcat ruse kishin pushtuar Melitopolin.
* Refugjatët që ikën nga pushtimi rus i Ukrainës vazhduan të drejtoheshin përtej kufijve të saj perëndimorë të shtunën, me rreth 100,000 persona që arritën në Poloni në vetëm dy ditë.
* Shërbimi i Sigurimit Shtetëror i Ukrainës (SBU) të shtunën mohoi një raport se helikopterët rusë kishin zbritur në rajonin e Lviv, një zhvillim që do të kishte sinjalizuar një zgjerim të mëtejshëm të pushtimit.
* Rusia do t'i përgjigjet konfiskimit të parave të qytetarëve dhe kompanive ruse jashtë vendit duke sekuestruar fondet e të huajve dhe kompanive të huaja në Rusi, citoi agjencia e lajmeve RIA, Dmitry Medvedev, njëri nga drejtuesit kryesor të sigurisë.
* Shërbimi i rojeve kufitare ukrainase tha të shtunën se Rusia kishte mbyllur pjesën veriperëndimore të Detit të Zi për lundrim.
*Forcat ruse po bëhen gjithnjë e më të frustruara nga ajo që Shtetet e Bashkuara besojnë se është "e qëndrueshme" dhe shumë e vendosur rezistenca ukrainase, tha një zyrtar i mbrojtjes amerikane.
* Papa Françesku thirri presidentin ukrainas Volodymyr Zelensky dhe shprehu "dhimbjen e tij më të thellë" për vuajtjet e Ukrainës.
* Twitter është duke u kufizuar për disa përdorues në Rusi, tha kjo kompani në një postim të shtunën.
* Faqja zyrtare e Kremlinit, kremlin.ru, nuk funksionoi të shtunën, pas raportimeve për sulm në uebsajte të ndryshme të qeverisë ruse dhe mediave shtetërore.
* Qeveria ukrainase ka udhëzuar termocentralet të kalojnë në gaz natyror për të ruajtur rezervat strategjike të qymyrit, tha kreu i prodhuesit më të madh privat të energjisë në vend.
* Të paktën 198 ukrainas, duke përfshirë tre fëmijë, janë vrarë si rezultat i pushtimit rus të Ukrainës, citohet të ketë thënë kreu i Ministrisë së Shëndetësisë të Ukrainës.
* Franca ka vendosur të dërgojë pajisje ushtarake mbrojtëse në Ukrainë për të mbështetur vendin kundër pushtimit rus, tha një zëdhënës i ushtrisë franceze, duke shtuar se çështja e dërgimit të armëve sulmuese ishte ende në shqyrtim.
* Gjigandi rus i energjisë Gazprom tha se po furnizonte gaz nëpërmjet Ukrainës në përputhje me kërkesën nga konsumatorët evropianë pavarësisht konfliktit ushtarak.
* Policia detare franceze kapi një anije të shtunën që autoritetet dyshojnë se i përket një kompanie ruse ndaj së cilës janë vendosur sanksione nga Bashkimi Evropian.
* Presidenti rus Vladimir Putin i kërkoi ushtrisë ukrainase të rrëzojë udhëheqjen e vendit dhe të negociojë paqen.
* Rusia vuri veton ndaj një projekt-rezolute të Këshillit të Sigurimit të OKB-së të premten. Rezoluta do të dënonte pushtimin e Ukrainës nga Moska, ndërsa Kina abstenoi nga votimi.
* Presidenti Joe Biden udhëzoi Departamentin e Shtetit të SHBA-së që të lëshojë armë shtesë në vlerë prej 350 milionë dollarësh nga stoqet e SHBA-së për Ukrainë të premten, derisa ajo përpiqet të zmbrapsë një pushtim rus.
Deklaratat e rëndësishme
“Ne do të luftojmë për aq kohë sa duhet për të çliruar vendin”, tha presidenti ukrainas Volodymyr Zelensky në një video-mesazh të postuar në rrjetet e tij sociale.
“Erdha në Berlin për të ngritur ndërgjegjen e Gjermanisë në mënyrë që më në fund të vendosin për sanksione vërtet të ashpra që do të ndikojnë në vendimet e Kremlinit”, u tha gazetarëve kryeministri polak Mateusz MoraWiecki përpara një takimi me kancelarin gjerman Olaf Scholz në Berlin.
“Në tetor 2020 patëm privilegjin të takojmë Presidentin Zelensky dhe Zonjën e Parë për të mësuar për shpresën dhe optimizmin e tyre për të ardhmen e Ukrainës”, thanë në Twitter Princi William dhe gruaja e tij Kate.
"Sot ne qëndrojmë me Presidentin dhe të gjithë popullin e Ukrainës teksa ata luftojnë me guxim për atë të ardhme”, Princi William dhe gruaja e tij Kate.