Եկել եմ երեք պարզ հարց տամ մեր արտաքին քաղաքականությունը որոշողներին, օրինակ, մեր պաշտոնական դիրքորոշումը Արցախի կարգավիճակի վերաբերյալ ո՞րն է․ Անժելա Էլիբեգովա
Եկել եմ երեք պարզ հարց տամ մեր արտաքին քաղաքականությունը որոշողներին։ Այս մասին Արցախի հարցով «Պատիվ ունեմ» խմբակցության կողմից հրավիրված խորհրդարանական լսումների ժամանակ իր ելույթում ասաց Ադրբեջանի հարցերով փորձագետ Անժելա Էլիբեգովան։
«Հարց առաջին. մեր պաշտոնական դիրքորոշումը Արցախի կարգավիճակի վերաբերյալ ո՞րն է։ Եթե մենք դիտարկում ենք Արցախի անկախությունը և որևէ պարագայում այն չենք դիտարկում Ադրբեջանի կազմում, ապա ինչո՞ւ եք մոռացել դրա մասին զգուշացնել ձեր թիմակիցներին, որոնք անառողջ համառությամբ մեզ շարունակում են հակառակը համոզել։
Եթե Ձեզ մոտ նման մտքեր արտահայտելու անվերահսկելի ցանկություն է առաջանում, լրագրողներին մի՛ պատմեք դրանց մասին, գնացեք, հոսող ջրին պատմեք, բայց աշխատեք արագ պատմել, որովհետև ջրի սակագները թանկացրել եք։
Ես կարող եմ ենթադրել, որ այդ մարդիկ ուղղակի չգիտեն հայ ժողովրդի պատմությունը։ Եթե Ձեզ հայկական Արցախը պետք չէ, ապա այն պետք է մեզ, մեր երեխաներին, մեր թոռներին,- ասաց Էլիբեգովան և նշեց երկրորդ հարցը։
Հարց երկրորդ՝ հայ-թուրքական բանակցությունների մեջ նախապայմաններ կան, թե՞ չկան, որովհետև հայկական կողմը պնդում է, որ չկան, թուրք-ադրբեջանական կողմը հերթով թվարկում է այդ նախապայմանները։ Եթե չկան նախապայմաններ, ապա պատմեք, տեսնենք՝ ինչի մասին եք դուք խոսում այդ բանակցությունների ժամանակ։ Ի՞նչ է ձեզ առաջարկում թշնամի պետությունը, որը տարիուկես առաջ մեր տղաներին վարձկաններով ու բայրաքթարներով սպանում էր, պատմեք՝ մենք էլ իմանանք։ Մենք ասելով՝ նկատի ունեմ այն հասարակությանը, որը ձեզ ձայն չի տվել ու չի լիազորել իրենց անունից խաղաղության դարաշրջան բացել, որովհետև այնպիսի խաղաղության դարաշրջան եք բացել, մի հումանիտար աղետից դուրս չեկած մյուսի մեջ ենք ընկնում։ Եթե վստահ եք, որ Ադրբեջանը իր կրակոցներով ձեզ չի կարող շեղել խաղաղության ճանապարհից, խնդրեմ, ձեր ընտանիքներով տեղափոխվեք Խրամորթ ապրելու և ըմբոշխնեք ձեր բացած խաղաղության դարաշրջանի պտուղները»,- ընդգծեց փորձագետը։
Էլիբեգովան շեշտեց՝ իշխանության ներկայացուցիչները չեն գնում Արցախ, որովհետև այնտեղ չեն կարողանում ապահովել նրանց անվտանգությունը։ «Շատ հոռի խաղաղության դարաշրջան եք բացել։ Ինչևէ, պատմեք՝ ինչ եք բանակցում, բայց հոդաբաշխ պատմե՛ք, առանց մարմնի մասերի անկանոն թափահարումների»,-ասաց նա։
Էլիբեգովայի հնչեցրած երրորդ հարցը վերաբերում էր նրան, թե ե՞րբ է Ադրբեջանը պատժվելու իր ռազմական հանցագործությունների համար։ «Ե՞րբ է Ադրբեջանը հայտարարվելու որպես ագրեսոր և ենթարկվի սանկցիաների, երբ է բարձրացվելու Արցախի դեօկուպացիայի հարցը։ Մեկուկես տարին բավականաչափ ժամանակ էր այդ ապացուցողայան բազան հավաքելու համար։ Ե՞րբ եք դա պատրաստվում անել, եթե իհարկե պատրաստվում եք»,– ասաց Ադրբեջանի հարցերով փորձագետ Անժելա Էլիբեգովան։