სალომე ზურაბიშვილი: შემაშფოთებელი იქნება საფრანგეთში პუტინთან უფრო ახლოს მყოფის გამარჯვება
საქართველოს პრეზიდენტმა, სალომე ზურაბიშვილმა MSNBC-სთან ინტერვიუში საფრანგეთის საპრეზიდენტო არჩევნებში მოქმედი პრეზიდენტის, ემანუელ მაკრონის შესაძლო დამარცხებისა და მარინ ლე პენის გამარჯვების პერსპექტივას “ძალიან შემაშფოთებელი” უწოდა.
“ძალიან შემაშფოთებელია, ასე რომ მოხდეს [ემანუელ მაკრონი დამარცხდეს], მაგრამ იმედი მაქვს, რომ ეს ასე არ იქნება. ყველაზე პროევროპული ლიდერი – ემანუელ მაკრონი, გერმანიის კანცლერ შოლცთან და პოლონეთის პრეზიდენტ დუდასთან ერთად არის სამი ლიდერი, რომლებიც აძლიერებენ ევროპას. ევროპას, რომელიც იცავს უკრაინას და ევროპას, რომელიც კარს უღებს სამ ასოცირებულ ქვეყანას, საქართველოს, მოლდოვას და, პირველ რიგში, უკრაინას.
ჩვენ ხვალ მივიღებთ კანდიდატის კითხვარს და ეს ძალიან მნიშვნელოვანი ნაბიჯებია. ეს არის რუსეთის შეჭრის ნამდვილი პასუხები. ამიტომ, არსებითად შემაშფოთებელი იქნება პუტინთან უფრო ახლოს მყოფი კანდიდატის გამარჯვების ნახვა საფრანგეთის არჩევნებში. ვფიქრობ ეს შეაშფოთებს ყველა ქვეყანას, რომლებიც დამოკიდებული არიან ძლიერ ევროპაზე. ევროპაზე, რომელსაც აქვს ხედვა საკუთარი მომავლისა და პარტნიორების შესახებ”. – თქვა ზურაბიშვილმა.