Зоир Мирзаев фуқаролар учун навбатдаги қабулида айрим мурожаатчиларга танбеҳ берди (видео) — Бизга қўшилинг: ???? https://t.me/joinchat/AAAAADwt0NGCRoONT4f1_Q

Тошкент вилояти ҳокими Зоир Мирзаев фуқаролар учун ташкил этилган навбатдаги қабулида қабулига такрор-такрор келаётган, шунингдек, баланд овозда гапириб, қабулга халал берувчиларга мурожаат қилиб, «ҳокимларни ёмон кўрувчиларнинг фарзанди ҳоким бўлсин», деди. Вилоят ҳокимлиги ахборот хизматининг маълумот беришича, Зоир Мирзаевнинг фуқаролар учун навбатдаги сайёр қабули бугун Янгийўл шаҳрида бўлиб ўтган. Қабул аввалида фуқароларга мурожаат қилган Зоир Мирзаев «Ўзимизнинг вақтимизни ўзимиз олмайлик, бу ерга келганда бақир-чақир қилиб, бошқаларнинг асабини бузмайлик, бизга ярашмайди бу», — деди. Тошкент вилояти ҳокими унинг қабулига кириб, овозини баландлатиб, бақириб, ўзининг ҳақлигини исботлашга уринаётганлар агар қонун жиҳатидан ҳақ бўлмаса, бу ҳаракати ҳам унга ёрдам бермаслигини таъкидлаган. - Мен қўлимдан келадиган ишни қиламан, дейман. Қўлимдан келмаса, шу заҳоти рад қиламан. Шу сабаб бир масала юзасидан менинг ёнимга эллик маротаба келиш шартмас. Бир муаммони қайтаряпсиз, биз йўқ деб рад қиляпмиз, яна шу муаммони айтиб, барчанинг вақтини олманг. Ҳамма нарсанинг ҳам қонуний ечими бор. Ҳеч ким ўзини артистликка солмасин, — дейди Зоир Мирзаев. Шунингдек, Зоир Мирзаев ҳокимлар ёмон, улар ҳеч қандай иш қилмаяпти, дегувчилар ҳам борлигини эслатиб, уларнинг фарзандлари ҳоким бўлишини тилаган. - Ҳокимларни ёмон дейишади. Тўғри, балки ёмондирмиз. Шунинг учун ҳам эрталабдан кечгача елиб-югуряпмиз. Қўлимиздан келганча ҳаракатдамиз. Ҳокимлар ёмон дегувчиларнинг фарзандлари ҳам ҳоким бўлсин, эртага ишдан толиқиб, икки кишига ёрдам беролмай, уйга келганда унинг юзига қараб, ҳокимлар иши қанчалик машаққатли эканини ҳис қилинг, — дейди Тошкент вилояти ҳокими. Зоир Мирзаев, шунингдек, ҳар сафарги қабулида соғлом инсонлар ҳам давлатдан пул сўраб келишини айтиб, «Соппа-соғ, ишлайман деса, кучи бор инсонларни ётқизиб, бир умр боқадиган давлат ҳеч қаерда йўқ», деган.