თამარ კორძაია ღარიბაშვილის მოსაზრებით დაინტერესდა ნიკა გვარამიას გათავისუფლებასთან დაკავშირებით
პარლამენტის დამოუკიდებელმა დეპუტატმა თამარ კორძაიამ პრემიერ-მინისტრ ირაკლი ღარიბაშვილს, რომელიც ინტერპელაციის წესის ფარგლებში დეპუტატების შეკითხვებს პასუხობს, ორ თემაზე პირადი მოსაზრება ჰკითხა.
ერთი შეეხებოდა 2014 წლის 16 სექტემბერს საგარეჯოს მუნიციპალიტეტის სოფელ ლამბალოში განვითარებულ მოვლენებს, რასაც 30 წლის ხანუმ ჯეირანოვას სიცოცხლე ემსხვერპლა. პროკურატურის ვერსიით, მან თავი მოიკლა.
მეორე საკითხი კი შეეხებოდა ტელეკომპანია "მთავარი არხის" გენერალური დირექტორის, ნიკა გვარამიას საპატიმროდან გათავისუფლების შესაძლებლობას.
„ხანუმ ჯეირანოვას თვითმკვლელობის საქმესთან დაკავშირებით, რაზეც გაეროს ადამიანის უფლებათა კომიტეტმა დაადგინა დარღვევა სახელმწიფოს მხრიდან და სახელმწიფოს ორი რამ დაევალა - 100 ათასი ლარის გადახდა ოჯახისთვის და ბოდიშის მოხდა შვილებისთვის - მაინტერესებს, როგორც უნდა განხორციელდეს სახელმწიფოს მხრიდან პროცედურულად ბოდიშის მოხდა“, - იკითხა კორძაიამ და დააზუსტა, რომ ოჯახისთვის იუსტიციის სამინისტროს მიერ წერილობით გაგზავნილი ბოდიშის გარდა, აპირებს თუ არა ბოდიშის მოხდას პრემიერიც. რაც შეეხება ნიკა გვარამიას გათავისუფლების შესაძლებლობას, მასზე დეპუტატი პრემიერის პერსონალური პოზიციით დაინტერესდა:
„ALDE-მ პერსონალურად თქვენ მოგმართათ გვარამიას გათავისუფლებასთან დაკავშირებით. იმას ვერ ვიტყვით, რომ ALDE-მ არ იცის, რომ სასამართლო ხელისუფლების დამოუკიდებელი შტოა და თქვენი პოზიცია მაინტერესებს - ნიკა გვარამია უკვე მაისიდან ზის ციხეში და თუ დეპოლარიზაცია გვინდა და თუ გვინდა ვალდებულებების შესრულება, თუ ხედავთ „ქართული ოცნების“ მხრიდან რაიმე კომპრომისს ამ საკითხთან დაკავშირებით? იმიტომ რომ მაისიდან ის უკვე სასჯელს იხდის და შესაძლებელია თუ არა კონკრეტული ნაბიჯების მოფიქრება თქვენი მხრიდან ამ საკითხთან დაკავშირებით, რომ ნიკა გვარამია იქნეს გათავისუფლებული“,- იკითხა თამარ კორძაიამ.
პროცედურის თანახმად, პრემიერ-მინისტრი დეპუტატთა შეკითხვებს მოგვიანებით გასცემს პასუხს.
2014 წელს 16 სექტემბერს საგარეჯოს მუნიციპალიტეტის სოფელ ლამბალოში 30 წლის ხანუმ ჯეირანოვას თანასოფლელი კაცები თავს დაესხნენ და საჯაროდ, მთელი სოფლის თვალწინ სასტიკად სცემეს. მომხდარიდან ორი დღის შემდეგ ხანუმ ჯეირანოვა გარდაიცვალა. პროკურატურის ვერსიით, მან თავი მოიკლა.
ევროპარლამენტში ლიბერალურ პარტიათა გაერთიანებამ - "ლიბერალთა და დემოკრატთა ალიანსმა ევროპისთვის" (ALDE) - 10 ნოემბერს გამოქვეყნებულ განცხადებაში, რომელსაც ხელს ALDE-ს პრეზიდენტი ილჰან კიუჩუკი აწერს, თქვა, რომ ევროკავშირის წევრობის კანდიდატის სტატუსის მისაღებად საქართველომ მნიშვნელოვანი რეფორმები უნდა გაატაროს. საქართველოს პირველი ნაბიჯი ევროპულ გზაზე არის ოპოზიციონერი ჟურნალისტის, ნიკა გვარამიას გათავისუფლება, რომლის მიმართაც განაჩენი გამოიტანეს ყალბი ბრალდებებით, რომლებიც დაგმეს ადამიანის უფლებათა დამოუკიდებელმა ორგანოებმა როგორც საქართველოს შიგნით, ასევე მის ფარგლებს გარეთ", - წერია განცხადებაში.
თბილისის სააპელაციო სასამართლოს კოლეგიამ 2 ნოემბერს გამოაცხადა ნიკა გვარამიას განაჩენი. მიღებული გადაწყვეტილებით, "მთავარი არხის" გენერალური დირექტორის სასჯელის ზომად მაინც 3 წელი და 6 თვე დარჩა, თუმცა მოსამართლეთა კოლეგიამ მას ბრალი დაუმძიმა.
საქართველოს პარლამენტში პრემიერ-მინისტრი ირაკლი ღარიბაშვილი ინტერპელაციის წესით "სტრატეგია აღმაშენებლის" პოლიტიკურმა ჯგუფმა დაიბარა. მათი შეკითხვები შეეხება ევროკავშირის წევრობის კანდიდატი ქვეყნის სტატუსის მისაღებად საჭირო 12 რეკომენდაციის შესრულებას და იმას, თუ რა გააკეთა მთავრობამ რეკომენდაციების მიღებიდან დღემდე.
ევროპული პერსპექტივა და 12 პირობა ევროკავშირის წევრობის კანდიდატის სტატუსის სანაცვლოდ, საქართველომ მიიღო 23 ივნისს.
საქართველოსგან განსხვავებით, კანდიდატის სტატუსი მიიღეს უკრაინამ და მოლდოვამ, თუმცა ევროკავშირის წევრობაზე მოლაპარაკებების დასაწყებად, ევროკომისიის რეკომენდაციები მათაც უნდა შეასრულონ.