ЧС. Бразілія ўпэўнена разабралася з Сербіяй

Героем сустрэчы стаў Рышарлісан.

Artykuł ЧС. Бразілія ўпэўнена разабралася з Сербіяй pochodzi z serwisu БЕЛАРУСКАЕ РАДЫЁ РАЦЫЯ.

Пасля 24 лістапада ўсе зборныя – удзельнікі мундыялю прадставілі свае візітоўкі.

Апошнімі на поле выйшлі дружыны Бразіліі і Сербіі. Што цікава, гэтыя каманды сустракаліся паміж сабой чатыры гады таму і тады на чэмпіянаце перамаглі бразільцы 2:0. Зараз гісторыя амаль поўнасцю паўтарылася. Нават іранскі суддзя быў той самы – Фагані. З той розніцай, што ў першым тайме шматразовым чэмпіёнам свету не ўдалося знайсці ключоў да брамы суперніка.

Але калі ў другой палове сустрэчы ўдалося забіць першы мяч – Рышарлісан удала згуляў на дабіванні, бразільцы загулялі разняволена і імправізацыйна. Карыснымі дзеяннямі вылучаўся Нэймар, а героем сустрэчы стаў той жа Рышарлісан, які сатварыў голавы шэдэўр – адным дотыкам тэхнічна апрацаваў перадачу і ў падзенні закалаціў мяч у сетку. Пасля гэтага трэнер Цітэ здзейсніў ратацыю кадраў і рэзервісты селесао таксама дзеілі вельмі пераканаўча.

Бразільцы маглі забіць яшчэ не раз, але сербы адчайна адбіваліся ад іх націску. Яшчэ аднойчы браму еўрапейцаў уратавала папярэчына. У цэлым жа Бразілія дамаглася пераканаўчай вікторыі і пацвердзіла свой статус фаварыта.

Бразілія – Сербія-2:0 (Рышарлісан, 62, 73).

Турнінае становішча ў групе G: 1. Бразілія – 3 ачкі, 2. Швайцарыя – 3 ачкі, 3. Камерун – 0, 4. Сербія – 0.

У папярэднім матчы групы Н Партугалія з максімальнымі высілкамі ўзяла верх над Ганай – 3:2. Насуперак чаканням многіх ганцы паказалі сябе вельмі баяздольнай камандай і на роўных змагаліся з куды больш зорнымі пірэнейцамі. У цэнтры ўвагі канешне быў Крышціяну Раналду, аднак у першыя 45 хвілін з даданым часам ні ён, ні яго партнёры нічым не здзівілі ганскую абарону.

Штуршок прэснаватаму спектаклю надаў міжволі галоўны арбітр сустрэчы, які пасля падзення Раналду ў штрафной афрыканцаў, прызначыў вельмі спрэчны пенальці. Галоўны ньюсмейкер тыдня і самы багаты на гэты момант беспрацоўны ў свеце ўпэўнена рэалізаваў 11-мятровы. Гэта быў 8-ы гол Раналду на чэмпіянатах свету і ён першы ў гісторыі забіваў мячы ажно на 5-ці чэмпіянатах.

Ганцы даволі хутка адыграліся – вызначыўся добра знаёмы аматарам са стажам Андрэ Айю. Далей галы пасыпаліся яшчэ хутчэй. Партугальцы выйшлі наперад 3:1, але іх супернікі былі вельмі блізкія да таго, каб вырваць нічыю.

Партугалія – Гана – 3:2 (Крышціяну Раналду, 65, з пенальці, Жуан Фелікс, 78, Рафаэль Леаа, 80; Андрэ Айю, 73, Асман Букары, 89)

Становішча ў квартэце Н: 1. Партугалія – 3 ачкі, 2-3 Уругвай і Паўднёвая Карэя – па 1, 4. Гана – 0.

У гэтай групе далей напэўна будзе вельмі „горача”.

Беларускае Радыё Рацыя

Artykuł ЧС. Бразілія ўпэўнена разабралася з Сербіяй pochodzi z serwisu БЕЛАРУСКАЕ РАДЫЁ РАЦЫЯ.