БУУнун баяндамачысы бийлик Болот Темиров боюнча кайрылуусуна жооп бербегенин жазды
Кайрылуунун толук тексти уюмдун укук коргоочулар боюнча атайын баяндамачысынын расмий сайтына жарыяланды.
Анда укук коргоочулар "Болот Темировдун кылмыш жоопкерчилигине тартылып, жарандыгынан ажыратылышы жана Кыргызстандын аймагынан депортацияланышы анын коррупцияга каршы ишмердүүлүгүнө түздөн-түз байланыштуу экенине тынчсыздануусун" билдирген. Ошондой эле сөз эркиндигине каршы, анын Кыргызстанда иштешине жол бербөө аракети болуп жатканы айтылган. Темиров боюнча соттук иштер тизмектелип, көрсөтүлгөн.
Кыргызстандын күч органдары журналист Орусиянын жараны экенин маалымдап, ал кыргыз паспортун мыйзамсыз алган деген айып таккан. Ишти караган Бишкек шаардык соту былтыр, 23-ноябрда аны өлкөдөн чыгаруу тууралуу чечим чыгарган. Темиров ошол эле күнү Бишкек – Москва каттамы аркылуу күчтөп Орусияга чыгарылган.
Ал өзүнө коюлган айып негизсиз экенин айтып, окуяларды журналисттик ишмердигине байланыштырган. Орусияга баргандан кийин биринчи жолу Фейсбуктагы баракчасына 2-февралда билдирүү жазып, өзү түптөгөн Темиров LIVE жана "Айт Айт Десе" командасы ишин уланта берерин жарыялады. (КЕ)