Президентликка номзод Робахон Махмудова сурхондарёлик сайловчилар билан учрашди
Бугун Сурхондарё вилояти Термиз шаҳридаги “Санъат саройи”да Ўзбекистон Республикаси Президентлигига “Адолат” социал-демократик партиясидан кўрсатилган номзод Махмудова Робахон Анваровнанинг сурхондарёлик сайловчилар билан учрашуви бўлиб ўтди.
Тадбирда партия фаоллари, депутатлар, меҳнат фахрийлари, фаол хотин-қизлар ва ёшлар ҳамда оммавий ахборот воситалари вакиллари иштирок этдилар.
Тадбирни Ўзбекистон “Адолат” социал-демократик партияси Сурхондарё вилоят Кенгаши раиси Рустам Ҳамраев кириш сўзи билан очиб берди.
Шунингдек, тадбир давомида партиядан Президентликка номзод Робахон Махмудованинг бош ишончли вакили томонидан йиғилганларга номзод ҳақида батафсил маълумот берилди.
Шундан сўнг номзод дастурида илгари сурилган 9 та устувор мақсад, яъни “Ҳуқуқий давлат қуриш — пировард мақсадимиз”, “Ижтимоий адолатни ва миллий иқтисодиётимизнинг барқарор ўсишини таъминлаймиз”, “Илм-фан, инновациялар ва таълим соҳасининг барқарор ривожи — тараққиётимиз кафолати”, “Аҳоли саломатлиги — улкан бойлик” каби йўналишларда қонун устуворлигини таъминлаш, тиббиёт ходимлари ва ўқитувчи-педагогларнинг мақомини мустаҳкамлаш, уларнинг меҳнатини рағбатлантириш, замонавий технология ва даволаш усулларини кенг жорий қилиш, “Ақлли тиббиёт” тизимини шакллантириш вазифалари белгиланганлиги алоҳида таъкидланди.