მედია: მსოფლიო ბანკი საქართველოს ეკონომიკური ზრდის შენელებას პროგნოზირებს
მსოფლიო ბანკი უახლოეს მომავალში, საქართველოს მშპ-ს ოთხთვიანი 7,3%-იანი ზრდის მიუხედავად, ქვეყნის ეკონომიკური ზრდის შენელებას პროგნოზირებს.
ბანკის ანგარიშში წერია, რომ ეკონომიკური ზრდის მთავარი მამოძრავებელი ფაქტორი მომსახურების ხარჯებთან არის დაკავშირებული, ხოლო სამრეწველო აქტივობა იკლებს. პროგნოზირებულია, რომ საქართველოს ეკონომიკური ზრდა მიმდინარე წლის განმავლობაში, პარტნიორ ქვეყნებში ნელი ზრდის გამო, 4,4%-მდე შენელდება, ვიდრე ვითარება 5%-მდე არ დასტაბილურდება.
ამასთან, მკაცრი მონეტარული პოლიტიკით მიზნობრივ 3%-ზე დაბლა დარჩება ინფლაციის დონე, რამაც მაისში დაბალი საერთაშორისო ფასებისა და ლარის გამყარების შედეგად 1,5%-ს მიაღწია.
ანგარიშის მიხედვით, არსებობს დაბალანსებული რისკები: კერძოდ, ერთის მხრივ, ფულადი სახსრების შემოდინებამ და გლობალური პირობების ცვლილებამ ლარის კურსზე, ხოლო მაღალი დოლარიზაციის გამო მაკროფინანსურ სტაბილურობაზე შესაძლოა, უარყოფითი გავლენა იქონიოს. მეორეს მხრივ, ფულადი სახსრების მუდმივმა შემოდინებამ შესაძლოა, სარგებელი მოუტანოს საქართველოს სავაჭრო კავშირებისა და სატრანსპორტო დერეფნების განახლებით.
მსოფლიო ბანკი გლობალური ეკონომიკური ზრდის შემცირებას 3,1%-დან 2,1%-მდე, ხოლო განვითარებად ბაზრებსა და ქვეყნებში 4,1%-დან 2,9%-მდე პროგნოზირებს. წამყვანი ეკონომიკის ქვეყნებში მოსალოდნელია, რომ ზრდა 2,6%-დან 0,7%-მდე შემცირდეს. მათთვის მნიშვნელოვანი ფაქტორი მონეტარული პოლიტიკის გამკაცრება და ენერგორესურსების გაძვირება იქნება.
საქართველოს სტატისტიკის ეროვნული სამსახურის მონაცემებით, მიმდინარე წლის აპრილში მთლიანი შიდა პროდუქტი, 2022 წლის ანალოგიურ პერიოდთან შედარებით, 7,5%-ით გაიზარდა, ხოლო იანვარ-აპრილის მშპ-ს საშუალო ზრდის ტემპმა 7,3% შეადგინა.