Դաշնային խորհրդում գտնում են, որ մասնավոր ռազմական ընկերությունները պետք է աշխատեն բացառապես Ռուսաստանի սահմաններից դուրս
ՌԴ Դաշնային խորհրդի միջազգային հարցերով հանձնաժողովի ղեկավարի առաջին տեղակալ Վլադիմիր Ջաբարովը կարծում է, որ մասնավոր ռազմական ընկերությունները պետք է աշխատեն բացառապես Ռուսաստանի սահմաններից դուրս։ Նրա կարծիքով՝ երկրի տարածքում կարող են աշխատել միայն կամավորական կազմակերպությունները, որոնք նախապես պայմանագրեր են կնքել ՌԴ ՊՆ-ի հետ։ Այս մասին գրում է kommersant.ru-ն:
«Հավանաբար, պետք է օրենքով արձանագրել, որ մասնավոր ռազմական ընկերությունները կարող են աշխատել միայն Ռուսաստանից դուրս՝ կատարելով Ռուսաստանի Դաշնության շահերից բխող առաջադրանքներ, ներսում կարող են լինել միայն ՊՆ-ի հետ պայմանագիր կնքած կամավորական կազմակերպությունները», - ՌԻԱ «Նովոստի»-ին ասել է Ջաբարովը:
Ըստ սենատորի, երբ մասնավոր ռազմական ընկերություններն իրենց առաջադրանքները կատարում են Աֆրիկայում կամ Սիրիայում, «այդ պարագայում պարզ է, նրանք օգնում են»: Ջաբարովը կարծում է, որ Ռուսաստանում այս ոլորտում բոլոր լիազորությունները պետք է ունենա միայն պաշտպանության նախարարությունը։
Հունիսի սկզբին ՌԴ ՊՆ-ն հրաման է արձակել, ըստ որի՝ Ուկրաինայում ռազմական գործողությանը մասնակցող բոլոր մասնավոր ռազմական ընկերությունները պարտավոր են պայմանագիր կնքել պաշտպանության գերատեսչության հետ։ ՊՆ-ից հայտնել են, որ կամավորական կազմակերպությունները նրա հետ պայմանագրեր կկնքեն մինչև հուլիսի 1-ը։ Հունիսի 23-ին «Վագներ»-ի հիմնադիր Եվգենի Պրիգոժինը պաշտպանության նախարարությանը մեղադրել էր իր ընկերության դիրքերին հարվածելու համար և հայտարարել էր «արդարության երթ» դեպի Մոսկվա։ Ավելի վաղ Պրիգոժինը բազմիցս հայտարարել էր պաշտպանության նախարարության հետ պայմանագիր կնքելուց հրաժարվելու մասին։