Азнакайда мәктәп яны лагерьларын ябу тантанасы булды
Быел Азнакай районында 21 мәктәп яны лагеры һәм 13 хезмәт һәм ял отряды эшләгән. Мәктәп яны лагерьларында 970 укучы, ә ял итү хезмәт лагерьларында 200 укучы ял иткән, дип яза «Азнакай» газетасы.
«Лагерь чорында балалар иркенләп аралашалар. Биредә аларның Һәр яңа көне алдагы көнгә охшамаган, ул кызыклы уеннар, яңа кешеләр белән танышу, якты тәэсирләр, аралашу һәм очрашуларга бай. Укучылар лагерьда нәрсәгә өйрәнделәр дип сорасагыз? Балалар дустанә мөнәсәбәткә, коллективта аралашырга, яңа уеннар һәм җырларга өйрәнделәр», – дип сөйләде 4 нче лицей тәрбиячесе Ләйсән Имаметдинова.
«Без музей, театрда булдык, кино карадык, спорт ярышларында һәм иҗади конкурсларда катнаштык. Ялыбыз бик кызыклы булды!» – диде 8 нче мәктәп укучысы Рузил Миникеев.
Мәктәп яны лагерьлары ябылса да, балалар өчен шәһәрдә төрле чаралар уздыру дәвам итә, диелә хәбәрдә.