Пекин Германиянинг Хитой бўйича янги стратегиясини танқид қилди

Пекин Германиянинг Хитой бўйича янги стратегиясини танқид қилди. Хитой Ташқи ишлар вазирлиги матбуот котиби Ван Вэнбин ҳужжатни «тескари самара берувчи» деб атади. «У дунё бўлинишини янада кучайтиради», — дея қўшимча қилди Вэнбин.

Шу билан бирга, Пекин Германия ҳукуматини протекционизмда айблаб, Берлинни Хитойдаги воқеаларга «ҳар томонлама ва холисона» қарашга чақирди.

Германия Вазирлар Маҳкамаси бир неча ой давом этган муҳокамалардан сўнг, 13 июл куни мамлакатнинг Хитой бўйича биринчи стратегиясини қабул қилди. Унга кўра, Германия савдони чекламасдан, Хитойга иқтисодий қарамликдан қутулмоқчи. 2022 йилда Хитой кетма-кет еттинчи марта Германиянинг энг муҳим савдо шериги бўлди: ўзаро товар айирбошлаш ҳажми 300 миллиард еврони ташкил этди.

Шунингдек, қабул қилинган ҳужжатда Берлин Пекинни Ҳинд-Тинч океани минтақасидаги агрессив сиёсати билан инсон ҳуқуқларини жиддий поймол қилишда ва халқаро ҳуқуққа путур етказишда айблаган.