ԱՄՆ-ն ու Ճապոնիան փորձում են «համակցված օպերատիվ ծրագիր» մշակել Չինաստանի և Թայվանի միջև զինված հակամարտության դեպքում․ WSJ
Միացյալ Նահանգներն ու Ճապոնիան փորձում են «համակցված օպերատիվ ծրագիր» մշակել Չինաստանի և Թայվանի միջև զինված հակամարտության դեպքում։ Այս մասին գրել է The Wall Street Journal-ը (WSJ)՝ հղում անելով իր աղբյուրներին։
Աղբյուների խոսքերով՝ Վաշինգտոնը Տոկիոյին դրդում է դիտարկել, օրինակ, կղզու մոտ «չինական սուզանավերի որսին» մասնակցելու հարցը։
WSJ-ը նշել է, որ ԱՄՆ-ն ու Ճապոնիան ավելի քան մեկ տարի աշխատում են ծրագրի վրա։ Նրանք քննարկում են զենքի մատակարարման ուղիները, հրթիռների տեղադրման վայրերն ու փախստականների տարհանման ծրագրերը։ Ճապոնիան պատրաստ է աջակցել ԱՄՆ զինված ուժերին վառելիքով և «այլ մատակարարումներով», սակայն Վաշինգտոնը «ավելի հստակություն է փնտրում» այս հարցում:
Պենտագոնի խոսնակը WSJ-ին ասել է, որ ԱՄՆ-ն ու Ճապոնիան կիսում են Թայվանի նեղուցում խաղաղության հաստատման հանձնառությունը, և որ Վաշինգտոնը ողջունում է Տոկիոյի շահագրգռվածությունը «իր դերի, առաքելությունների և կարողությունների ընդլայնման հարցում», ինչը «կուժեղացնի Չինաստանի զսպումը»: Հարցին, թե արդյոք կողմերը պլան են պատրաստում հակամարտության դեպքում, Ճապոնիայի կառավարության խոսնակն ասել է, որ երկրներն ունեն «համատեղ պաշտպանական ծրագրեր», սակայն մանրամասներ չի հայտնել։
Հունիսին, Չինաստան կատարած այցի ժամանակ, ԱՄՆ պետքարտուղար Էնթոնի Բլինքենը վստահեցրել էր Չինաստանի իշխանություններին, որ Վաշինգտոնը չի աջակցում Թայվանի անկախությանն ու չի ցանկանում հակամարտել Պեկինի հետ։ ԱՄՆ-ը հայտարարել է, որ Չինաստանն ու Թայվանը պետք է լուծեն իրենց տարաձայնությունները խաղաղ ճանապարհով։