Россиядә хәрби хезмәткә язгы чакырылыш тәмамланды

Россиядә хәрби хезмәткә язгы чакырылыш төгәлләнде. Ватан алдындагы хәрби бурычын үтәү өчен, РФ Кораллы көчләренә һәм башка хәрби берләшмәләргә барлыгы 147 мең кеше озатылды, дип хәбәр итә Саклану министрлыгы. Бу хакта «Российская газета» яза.

Шул ук вакытта, хәрби хезмәткә чакырылыш буенча армиягә китүчеләр, үз срокларын тутырып, өйләренә озатылды, дип искәрттеләр ведомствода.

Моннан алдагы чакырылыш кампанияләре кебек үк, хәрби комиссариатларга килгән егетләргә, үзләренең сәламәтлеген һәм һөнәри психологик сайлап алу нәтиҗәләрен исәпкә алып, армия хезмәтен узу өчен төрле гаскәрләрне сайлау мөмкинлеге бирелде, дип хәбәр итә министрлык.

Егетләр көндәлек форма белән тәэмин ителде. Хәрби-диңгез флоты өчен ул – кара, Һава-космик көчләр һәм Һава-десант гаскәрләре өчен – зәңгәр, калган гаскәрләр өчен – саклагыч төстә. Моннан тыш, хәрби хезмәткә китүчеләргә банк һәм шәхси электрон карталар, шулай ук несессерлар тапшырылды.