«Եռաբլուրում» ՔՊ-ական պատգամավորների ու զինծառայողների ծնողների միջև քաշքշուկ է սկսվել (լուսանկարներ)
Արցախյան 44-օրյա պատերազմում զոհված զինծառայողների ծնողներն ամբողջ գիշեր անցկացրել են «Եռաբլուր» զինվորական պանթեոնում, որպեսզի առավոտյան թույլ չտան վարչապետ Նիկոլ Փաշինյանին ու իշխանության ներկայացուցիչներին մուտք գործել «Եռաբլուր»:
Ծնողներից մեկը լրագրողների հետ զրույցում նշեց. «Օրը փոխվելուն պես այստեղ ենք եղել։ Մենք հայտարարություն էինք տեղադրել «Որդիների կանչ» ՀԿ-ի էջում, որ լուսաբացը դիմավորելու ենք այստեղ ու թույլ չենք տալու, որ այս սրիկաները, ապիկարները ոտք դնեն այստեղ, որովհետև իրենք դրա իրավունքը չունեն։ Իրենք այստեղի իմաստը չեն հասկանում, ձևական գան, որ ի՞նչ»:
Հարցին՝ կարծում է արդյոք, որ վարչապետ Նիկոլ Փաշինյանը կայցելի այսօր «Եռաբլուր», զոհվածի ծնողը պատասխանեց․ «Կարծում եմ՝ չի գա։ Հաշվի առնելով՝ ով է ինքը, իր վախկոտության աստիճանը, կարծում եմ՝ չի գա»։
Ավելի ուշ համացանցում տեսանյութ հրապարակվեց, որում երևում է, որ ՔՊ-ական պատգամավորներից ոմանք այցելել են «Եռաբլուր», որտեղ էլ ընդհարում է տեղի ունեցել զոհվածների ծնողների հետ։ Հրապարակված կադրերում, մասնավորապես, երևում է, որ «Եռաբլուր» են այցելել Հակոբ Ասլանյանն ու Հովիկ Աղազարյանը, սակայն իրավիճակը լարվել է և նրանց ու ներկաների միջև քաշքշուկ ու բախում է սկսվել, ինչից հետո միջամտել են ոստիկանները։