Америкалик олимлар томонидан океандаги пластик чиқиндиларни парчалайдиган бактерия яратилди

Шимолий Каролина университетининг америкалик олимлари томонидан океандаги пластик чиқиндиларни парчалашга қодир генетик жиҳатдан ўзгартирилган бактерия яратилди.

Тадқиқотчиларнинг фикрича, янги микроорганизм Тинч океанининг катта чиқинди уюмига қарши курашишда ёрдам беради.

Олимлар тажриба учун икки турдаги бактериялардан фойдаланишди. Биринчиси – Vibrio natriegens – шўр сувда ўзини яхши ҳис қилиши ва тез кўпайиши билан ажралиб туради. Иккинчиси, Ideonella sakaiensis – пластикни парчалайдиган ферментларни ишлаб чиқариши мумкин.

Биомуҳандислар бу хусусиятларни бирлаштириб, янги микроорганизмни яратишди. Бунинг учун улар Ideonella sakaiensisдан пластикни парчаланишига имкон берувчи генетик воситаларни олиб, уларни автоном репликацияга қодир бўлган плазмид – ДНК молекуласига жойлаштиришди. Кейинчалик генлар билан плазмид Vibrio natriegens ҳужайрасига жойлаштирилди.

Натижада полиэтилентерефталатни цельсий бўйича плюс 30 даража иссиқда шўр сувда парчалаш қобилиятига эга генетик жиҳатдан ўзгартирилган бактерия ҳосил бўлди. Олимлар тадқиқотнинг навбатдаги босқичида пластикнинг парчаланиши натижасида кимё саноатида фойдаланиш имконини берувчи маҳсулот олишмоқчи.

Тинч океанининг катта чиқинди уюми дунёдаги энг катта океан пластиклари чиқиндилари йиғилган жой. Унинг майдони 1,6 миллион квадрат километрга етади – бу Франция майдонидан уч баравар катта, деб хабар беради mir24.tv.