უკრაინის შსს-მ გამოაქვეყნა რუსეთის სარაკეტო შეტევის წინასწარი შედეგები
უკრაინის შინაგან საქმეთა მინისტრმა იჰორ კლიმენკომ გამოაქვეყნა თავდასხმის პირველადი შედეგები. მინისტრის ინფორმაციით, ჩერკასში სარაკეტო დარტყმის შედეგად დაინგრა სასტუმროს შენობა და ხანძარი გაჩნდა ბაზრის ტერიტორიაზე. დაშავდა 7 ადამიანი.
კიევსა და კიევის ოლქში დაზიანებულია შენობები და ერთ-ერთი საწარმო. კიევში 7 ადამიანი დაშავდა, ხოლო კიევის ოლქში - 2.
ხარკოვში დაზიანებულია სასაწყობე შენობა, დაიჭრა 2 ადამიანი. სამოქალაქო ინფრასტრუქტურის ობიექტები დაზიანდა როვნოს ოლქში. ლვოვის ოლქში სარაკეტო დარტყმა იყო სამრეწველო ზონაზე.
უკრაინის საჰაერო ძალების სარდლობამ ადგილობრივი დროით დილის 5 საათისთვის გამოაქვეყნა გაფრთხილება, რომ რუსეთის საოკუპაციო ძალების Ту-95МС ტიპის თვითმფრინავებიდან მოსალოდნელია ფრთოსანი რაკეტებით შეტევა და მოქალაქეებს თავშესაფრებში გადასვლისკენ მოუწოდა. უკრაინის ტერიტორიაზე გამოცხადებული საჰაერო განგაში დილის 7 საათისთვის შეწყდა.
სარაკეტო შეტევის გარდა, გასულ ღამით და დღეს დილით, რუსმა სამხედროებმა საარტილერიო იერიში მიიტანეს ქალაქ ხერსონზე. დარტყმა იყო საერთო საცხოვრებლის შენობასა და მრავალბინიან კორპუსზე. დაიღუპა 3 ადამიანი.