Парламентте Мадумаров боюнча комиссия түзүү маселеси бүгүн да чечилбей калды

Жогорку Кеңештеги “Бүтүн Кыргызстан” фракциясынын лидери Адахан Мадумаровдун кармалышынын мыйзамдуулугун териштирүү боюнча депутаттык комиссия түзүү маселеси парламенттин бүгүнкү 21-сентябрдагы жалпы отурумунда да көтөрүлдү. Аталган фракциядан депутат Алишер Эрбаев маселени кайрадан добушка коюуну суранды:


“Ар бир фракция өзүнүн өкүлүн көрсөтүп, бирок түшүнбөстүктүн негизинде протокол бекитилбей калган. Бүгүнкү күн тартибине ушуну биринчи кылып киргизип берсеңиз. Ушундай эле кайрылуу менен “Альянс” фракциясы да БШКнын депутат Алимжанов тууралуу чечими боюнча комиссия түзүүнү сунуштап жатат. Азыр эгер бул боюнча комиссия түзүлүп, ал эми Мадумаровго келгенде түзүлбөй кала турган болсо коомдоо терс ойлорду жаратып калышы мүмкүн”.


Жыйынга төрагалык кылып жаткан вице-спикер Нурлан Сыдыгалиев сунушту маселе кечээ каралганда көтөрүш керек болчу деп айтты:


“Кийинки жумада киргизебиз. Бүгүн киргизе албайм. Кечээ дароо киргизиш керек болчу. Кайра кайрылып келсек болот 80-берене боюнча дагы бир жолу добушка койсок болот”.   


Сыдыгалиевдин мындай жообуна байланыштуу “Бүтүн Кыргызстандын” депутаты Гуля Кожокулова “оппозицияга карата тандалма мамиле” жасалып жатканын айтты:


“Анын үстүнө, казус окуя болуп кетти – баары комиссия түзүлсүн деген добушун беришти, комиссия иш жүзүндө түзүлдү, анын курамы боюнча гана добуш жетпей калды. Мисал келтирип айтпай эле коёюн азыр, бирок кээ бир маселе боюнча кайра добушка коюлуп, ал эми кээ бирлерине, оппозицияга келгенде, коюлбай калууда. Бул туура эмес да”.


Бийликтин дарегине ачык сын айтып келген Мадумаровду милиция 2-сентябрда кармап кетип, соттун чечими менен ал Улуттук коопсуздук боюнча мамлекеттик комитеттин (УКМК) тергөө абагына 24-октябрга чейин камалган. Кыргыз-тажик чек арасындагы тилке боюнча 2009-жылы протоколго кол койгону үчүн ага “Мамлекеттик чыккынчылык” деген берене менен айып тагылды. Президент Садыр Жапаров ошол протоколдун айынан Баткендеги Төрт-Көчө талаш жаратып жатканын билдирген. Мадумаров өзү ал протоколдун юридикалык күчү жок экенин билдирген.  


Саясатчынын камакка алынышы канчалык мыйзамдуу болгонун аныктоо үчүн парламентте комиссия түзүү сунушталып, кечээ 20-сентябрда өтпөй калган.


Комиссиянын курамына алгач алты депутат кирген –Жанарбек Акаев («Альянс»), Султанбай Айжигитов («Ыйман Нуру»), Шараптакан Мажитова («Ынтымак»), Жалолидин Нурбаев («Элдик»), Айсара Абдибаева («Ишеним») жана Гуля Кожокулова («Бүтүн Кыргызстан»).


Бирок «Мекенчил» депутаттар тобу менен «Ата-Журт Кыргызстан» фракциясы комиссияга өз өкүлдөрүн сунуштабай коюшкан.



Мындан улам депутат Дастан Бекешев мүчө болуу сунушун айтып чыккандан кийин комиссия түзүү маселеси добушка коюлган. Натыйжада 40 депутат макул болуп, 11и каршы чыккандыктан Нурбек Сыдыгалиев комиссиянын курамы үчүн жети киши, ал эми аны түзүү үчүн 46 добуш керек экенин айтып, кийинки маселени кароого өткөн. (RK)