Хитой АҚШ билан урушга тайёрланмоқда — Жон Болтон
Хитой АҚШ билан уруш қилишга фаол тайёргарлик кўрмоқда. Бу ҳақда Дональд Трамп маъмуриятида миллий хавфсизлик бўйича маслаҳатчи бўлиб ишлаган Жон Болтон разведка маълумотларига таяниб маълум қилди, деб ёзмоқда The Telegraph.
Унга кўра, Болтон АҚШ ҳарбий-ҳаво кучлари котиби Фрэнк Кендаллнинг урушга тайёргарлик ҳақидаги гапларини эслатди.
“Бу таҳдид ҳарбий ишлар билан чекланиб қолмайди, балки сиёсат ва иқтисодга ҳам тааллуқлидир. Сўнгги ўн йил ичида биз бу таҳдидни турли даражада тан олдик. Кўп ҳолларда биз таҳдидларнинг катталиги ва кўламини баҳолашда хавфли даражада сустлик қилдик”, — деди Болтон.
Унинг таъкидлашича, Хитой ўнлаб йиллардан бери Ғарбга қарши иқтисодий уруш олиб бормоқда: интеллектуал мулкни ўғирлаш, ЖСТ каби савдо институтлари доирасида меркантилистик сиёсатини олиб бориш, ўзининг муҳим ички бозорларини хорижий рақобатдан ажратиб қўйиш ва бир вақтнинг ўзида Ғарбдаги очиқликдан фойдаланиш каби.
Болтон Хитойга ҳаддан ташқари кўп сармоя киритган ёки Пекинга ҳаддан ташқари қарам бўлиб қолган америкалик йирик бизнес эгаларини айблади.
“Улар шунча йилдан буён Совет Иттифоқи қулаши халқаро сиёсий хавф тугаганини англатмаслигини тушунмаяпти”, — деб таъкидлади Болтон.