Балбан Акжол Махмудов Олимп оюндарына жолдомо алды

Балбан Акжол Махмудов Сербиянын Белград шаарында өтүп жаткан күрөш боюнча Дүйнө чемпионатынын финалына чыгып, 2024-жылкы Париж Олимпиадасына жолдомо алды. Бул Олимп оюндарына алынган Кыргызстандын куржунундагы 4-жолдомо.


Акжол Махмудов 21-сентябрда грек-рим күрөшүнөн 77 кг салмакта жарым финалда жапониялык Нао Кусаканы 7:5 эсебинде утту. Ал буга чейин норвегиялык Пер Андерс Курени (4:3), 1/8 финалда египеттик Мохаммед Ехаб Захаб Халилди (9:0), ¼ финалда өзбекстандык Арам Варданянды (6:0) уткан.


Эми 22-сентябрда алтын байге үчүн азербайжандык Санан Сулейманов менен беттешет. Таймаш Бишкек убактысы боюнча саат 22:00дө башталат.


Акжол Махмудов 24 жашта. Азиянын үч жолку чемпиону (2018-ж., 2022-ж., 2023-ж. ) Олимп оюндарынын күмүш байгесинин ээси (2021-ж.) жана Дүйнө чемпиону (2022-ж.). Кадеттер (уландар) арасында Дүйнө чемпиону (2016-ж.). Жаштар арасында Дүйнө чемпионатынын күмүш (2017-ж.) жана коло байгелеринин ээси (2018-ж.). Уландар жана жаштар арасында Азия чемпиону (2016-ж., 2017-ж.).


Буга чейин Париж Олимпиадасына жолдомого кыз-келиндер күрөшүнөн Айпери Медет кызы, Айсулуу Тыныбекова жана сууда сүзүүдөн Денис Петрашов ээ болгон.


16-сентябрда башталган күрөш боюнча Дүйнө чемпионаты 24-сентябрга чейин уланат. Таймаштар эркин күрөш, грек-рим күрөшү жана кыз-келиндер күрөшүнөн 10дон салмакта өтүп жатат. Мелдеште олимпиадалык салмактарда алтын, күмүш, коло байге алгандарга жана 5-орунду ээлеген бирден балбанга Олимп оюндарына жолдомо берилет (жалпы 90 жолдомо).


Күрөш боюнча Олимпиадага жолдомо берилчү салмактар төмөндөгүдөй:

Эркин күрөштөн 57, 65, 74, 86, 97 жана 125 кг, грек-рим күрөшүнөн 60, 67, 77, 87, 97 жана 130 кг жана кыз-келиндер күрөшүнөн 50, 53, 57, 62, 68 жана 76 кг. (ECh)