До крајот на неделата, ЕУ ќе испрати 55 тони помош за жителите на Газа
„До крајот на неделата со авиони од италијанскиот град Бриндизи ќе бидат испратени 55 тони помош. Следната недела од Букурешт ќе бидат реализирани три лета, а Романија ќе обезбеди шатори. До крајот на месецот авион со помош на Обединетите нации ќе полета од белгискиот град Остенде“, се додава во соопштението.
Преку воздушниот мост отворен меѓу ЕУ и Египет, изминатите недели беа реализирани 14 летови и испратена е итна помош од 550 тони.
Претседателката на Европската комисија, Урсула фон дер Лајен прецизира дека се планира помошта да се испраќа и по морски пат.
„ЕУ отсекогаш била најголемиот донатор за Палестинците“, рече претседателката на ЕК.
Таа истакна дека Европската унија четирикратно ја зголемила помошта за Газа оваа година на повеќе од 100 милиони евра и дека им дава поддршка на најранливите Палестинци веќе 23 години.