Быел җәй Татарстан җитәкчелегенең хезмәт хаклары артачак
2024 елның 1 июленнән ТР дәүләт вазифаларын биләүче затларны акчалата бүләкләү арттырылачак. Алар арасында Татарстан Рәисе, ТР Дәүләт Советы Рәисе һәм башкалар. Бу республика җитәкчесе Рөстәм Миңнеханов имзалаган указдан аңлашыла.
«Татарстан Республикасы дәүләт вазифаларын биләүче затларга айлык акчалата бүләкләү күләмен исәпләү өчен <...> Татарстан Республикасы министрының 46 543 сум тәшкил иткән айлык акчалата бүләкләү күләмен 1,05 тапкыр индексацияләргә», - диелә документта.
1 июльдән Татарстан Рәисенең айлык акчалата бүләкләү күләме 2,92 айлык акчалата бүләкләүне, ТР Дәүләт Советы Рәисенеке — 2,839, ТР Рәисе Администрациясе җитәкчесе, ТР Хисап палатасы рәисенеке — 2,675 тәшкил итәчәк.
Моннан тыш, парламент җитәкчесе урынбасарлары, вице-премьерлар, Үзәк сайлау комиссиясе рәисе, Дәүләт Советы депутатлары һәм ТРның башка дәүләт вазифаларын биләүче затлар өчен акчалата бүләкләүләр күләме үзгәрәчәк.
Чагыштыру өчен, Татарстан Республикасы министрының айлык акчалата бүләкләү күләме хәзерге вакытта 44 326 сумны тәшкил итә.