Татарстан һәм Башкортстан чигендә күперне су баскан
Азнакай районында Тымытык авылы янында Татарстан белән Башкортстанны тоташтыра торган Ык елгасы аша тәбәнәк күперне су баскан. Су басу сәбәпле, күпер буенча хәрәкәт ябык, тыю билгеләре куелган, халык белән аңлату әңгәмәләре үткәрелгән. Бу хакта Россия Гадәттән тыш хәлләр министрлыгының Татарстан буенча Баш идарәсе хәбәр итә.
«Вакытлы гидрологик пост мәгълүматлары буенча күпер өстендә ташкын 10 см тәшкил итә. Торак йортлар су басу зонасына эләкми, торак пункт белән транспорт элемтәсе бозылмаган, торак пунктка юл бар. Тымытык бистәсе өчен Октябрьск шәһәре аша урап узу маршруты планлаштырылган», - диелә ведомство хәбәрендә.