მოსკოვის პროკურატურა მოითხოვს ბორის აკუნინის გასამართლებას "უცხოეთის აგენტების" მუხლით

მოსკოვის პროკურატურამ სისხლისსამართლებრივი დევნა წამოიწყო მწერალ ბორის აკუნინის (გრიგორი ჩხარტიშვილი) წინააღმდეგ, "უცხოეთის აგენტების" კანონით განსაზღვრული წესების დარღვევის გამო.

პროკურატურის განცხადების თანახმად, მწერალს ორჯერ დააკისრეს ადმინისტრაციული პასუხისმგებლობა, მაგრამ მან განაგრძო შეტყობინებების და მასალების გავრცელება იმის აღნიშვნის გარეშე, რომ რუსეთში "უცხოეთის აგენტადაა" გამოცხადებული.

პროკურატურა საგამოძიებო ორგანოებს მიმართავს სისხლის სამართლის გამოძიების დაწყების თხოვნით, "უცხოეთის აგენტების" ვალდებულებებისთვის თავის არიდების მუხლით.

ბორის აკუნინი 2014 წლიდან ლონდონში ცხოვრობს. იგი ხშირად გამოდის რუსეთის პრეზიდენტის, ვლადიმირ პუტინის პოლიტიკის კრიტიკით, აკუნინი აკრიტიკებდა ყირიმის ანექსირებას და რუსეთის მხრიდან უკრაინაში სრული მასშტაბით შეჭრას.

2023 წლის დეკემბერში უწყება "როსფინმონიტორინგმა" აკუნინის სახელი შეიტანა "ტერორისტებისა და ექსტრემისტების" სიაში. იმ დროსვე ცნობილი გახდა, რომ საგამოძიებო კომიტეტმა მწერლის წინააღმდეგ აღძრა სისხლის სამართლის საქმე, ტერორიზმის საჯაროდ გამართლების და რუსეთის არმიის შესახებ ყალბი ამბების გავრცელების მუხლებით. 2024 წლის იანვარში აკუნინი "უცხოეთის აგენტად" გამოაცხადეს. მის წინააღმდეგ სისხლის სამართლის საქმის აღძვრის შემდეგ ჩხრეკა ჩატარდა გამომცემლობა "ზახაროვში", რომელიც მწერლის წიგნებს ბეჭდავს. გამომცემლობა АСТ-მა და მაღაზიათა ქსელმა "ჩიტაი-გოროდმა" შეწყვიტეს აკუნინის წიგნების გავრცელება. აკუნინის სახელი წაშალეს მისი პიესების მიხედვით დადგმული სპექტაკლების აფიშებიდან, ზოგიერთმა თეატრმა ეს სპექტაკლები საერთოდ მოხსნა პროგრამიდან.