Исроил мудофаа вазири Ғазони “тўлиқ йўқ қилиш” билан таҳдид қилди

Исроил мудофаа вазири Исраэл Кац фаластинликлар гаровга олинганларни озод қилмаса ва ҲАМАСни қувиб чиқармаса, Ғазони “бутунлай йўқ қилиш” билан таҳдид қилди. Бу ҳақда у ҳарбий идора матбуот хизмати тарқатган видеомурожаатда маълум қилган.

“Агар барча исроиллик гаровга олинганлар озод қилинмаса ва ҲАМАС Ғазодан қувилмаса, Исроил сиз илгари билмаган кучларни ишга солади. АҚШ президенти Дональд Трампнинг таклифини қабул қилинг, гаровга олинганларни қайтаринг ва ҲАМАСни ҳайданг. Сиз учун бошқа имкониятлар жумладан, хоҳловчилар учун дунёнинг бошқа жойларига кўчиб ўтиш имконияти очилади. Муқобил вариант — тўлиқ вайрон қилиш ва йўқ қилиш”, деди у.

Бундан ташқари, Кац Ғазо секторидаги жанговар ҳаракатлар ҳудудларидан аҳолини эвакуация қилиш тез орада бошланишини эълон қилди.

“Исроил ҳарбий-ҳаво кучларининг ҲАМАС террорчиларига берган зарбалари фақат биринчи қадам эди. Давоми анча оғир бўлади, сиз тўлиқ бадални тўлайсиз”, дея огоҳлантирди Кац.

Қуруқликдаги ҳаракатлар доирасида Исроил ҳарбийлари Исроил жанубидаги Бери туманидан денгиз соҳилигача Ғазо секторини кесиб ўтувчи ва эксклавнинг шимолий қисмини жанубий қисмидан ажратиб турувчи Нэтсарим йўлаги марказига ўз назоратини кенгайтирди.

Яқин Шарқ оммавий ахборот воситаларининг таъкидлашича, ҳозирда Исроил қўшинлари Ғазо секторини шимолий ва жанубий қисмларга ажратиб турувчи Нэтсарим йўлагининг тахминан ярмини, минтақадаги асосий автомагистрал — Салоҳиддингача бўлган ҳудудни эгаллаб олган.